Auleria Wakudumo
ONGWEDIVA- Lisa Nekanda oo ali a vena po epaya lokakadona dingi momaulikilo oipindi aNgwediva neudo okwa holola osho a hala okulalakanena onga okakadona dingi neudo.
Nekanda okwa li a kufa ombinga mefiyafano lokakadona dingi olo la liko muAuguste neudo.
Pefimbo ta kufa ombinga, okakadona dingi Nekanda oka holola kutya otaka popile ehongo lokoiputudilo yopaungoba. Nekanda okwa ti ota popile ehongo eli shaashi okuli omulihongihongi moshilongwa shomwaalu oshoyo odesign and technology oyo inasha noiputudilo yopaungoba.
Nekanda okwa holola yo kutya momukokomoko wokukufa ombinga mefiyafane po eli, okwa mona eshongo eshi oinima konyala aishe ya ningwa moule woshivike.
“Molwaashi omadingonoko aeshe okwa ningwa moule wefimbo lixupi, onda loloka neenghono ashike nande ongaho inandi kwatwa kedilaadilo lokushuna omutwe moipeta shaashi onda li nda hala okuvena,” Nekanda ta holola.
Oukadona ava ovali veli omulongo omo va tano va wamo medingonoko lashikula ko navatano oveshi pondola okukufa ombinga medingonoko laxuuninwa omo mwadja okakadona kopedu dingi.
Oukadona ava ovali va kufa efiyafane momadingonoko a yooloka ngaashi edingonoko lomaudano, edingonoko lokuulika oikutu yokuyowa, oikutu yokonguloshi hano oevening gown, edingonoko lokuulika lokunyamukula omapulo okudja kovatokoli va yooloka nomadingonoko makwao a wedwa po.
Nekanda okwa hovela nale okutula aishe oyo a hala okulalakanena moilonga. Pehovelo lomwedi ou, Nekanda opamwe nehangano lokukalela po ovalihongi mOshana hano (Nanso) ola yandja oututa voukadona ve dule 100 nokundungika ovahongwa pofikola.