Abraham Mwanyekange 

MTC Nestor Sunshine Boxing Academy otai ka unganeka omaudano eengonyo moshilongo momafiku 9 aMei omo tava ka fimaneka edina lomukokolipresidente wotete waNamibia Sam Nujoma. Omaudano otaa ka danenwa moWindhoek Show Ground. 

Nestor Tobias mwene wo-MTCNSBA pefimbo ta popi noikundaneki okwa ti oudano otau ningwa nelalakano okudimbuluka onghandangala ya danwa kovaleli Ovanamibia oyo ya eta emanguluko osho yo va pala ondjila opo Ovanamibia va mone eemhito da manguluka okukufa ombinga momaudano pondje yoshilongo. 

Oudano wefiku wakula otau ka kala pokati kaFilipus Nghitumbwa ta ka popila epaya laye lo-WBO Global eshi ta ka ya mondabo na Leonardo Corrales a yambuka poColombia, moudano oo wa talika tau ka lya ehete. Tobias okwa ti oudano oo ota u kakala waxuuninwa wa Nghitumbwa nongeenge okwa vene otaka lwila epaya lounyuni manga odula ina ipwako. 

“Oudano ou owakula pokati komanyakwa avali ounyuni. Naau takafindanapo oudano ou otaka tulwa ponghatu yopombada moudano weengonyo mounyuni yee tamono omito yokulwila epaya lounyuni moshivixa shavo,” Tobias ta ti. Vamwe tava kakufa ombinga momaudano omo ongaashi Mateus Heita taka popila epapa laye lo WBO Africa nomu South Africa’s Zolisa Beze, Harry Simon Jr otakataalela Freeman Mbadekwe womu Zimbabwe omanga Joy Nangolo voo na Naftalie Shooya navo ota vakaya mondabo mefiku olo. Heita, lwahuuninwa okwa li akalwa koMadison Square Garden, mo New York sha America. Okwati paife okuna ounongo neshiivo lawana konima eshi akanifa oudano waye. “Ondeli honga shihapu nomopaife ondelilongekida okuya nkomesho ame ndikashonge omapap akula,” ta ti. 

Simon Jr okwa ati okuna omukumo nelineekelo muyeemwene. Okwa indila ova holi voudano weengonyo vaye koudano momwaalu uhapu opo vekevayambidide. 

Kakele koudano weengonyo, Tobias okwa ti oshafimana unene okudimbulukwa nokufimaneka Edina la Nujoma molwaashi otashi ulike oweendo laendwa opo pa etwe emangulkooshoyo eemito dovaNamibia moikondo aishe yoshilongo omo mwakwatelwa omaudano. 

“Manga kwa li oshilongo inashimanguluka, ovadanauki vetu kakwali havakufa ombinga momaudano pondje yoshilongo. Ashike nena otunamo omanyakwa ounyuni shaetwa kemanguluko. Yo oilonga pondoli oyo hatudimbulukwa paife ngaashi oyo yalongwa komanyakwa oo Harry Simon, Paulus Moses na Julius Iindong,” Tobias ta ti. 

Eshi oshikando oshitivali oudano woludhi eli taukufa ombinga nokwateelelikwa ukale haukalako keshe kodula unene okuxwaxwameka eyambulepo loudano weengonyo moshilongo. 

Oudano owa kwashilipalekwa kehangano leengodi dopeke MTC meyambidido lo PstBet, nokwa teelellikwa omahangano ahapu awa imine. 

-abbenghilai@gmail.com