Uuministeli wuuhaku nonkalonawa otawu hiya oshigwana moshilongo ashihe opo shi fale aanona koshikonga oshititatu shotuntila okukeelela omukithi gopolio. Sha ikolelela komushangwa gwa pitithwa kuuministeli wuuhaku nonkalonawa, olweetho ndoka otalu ningwa konima kwa ndhindhilikwa omikithi dhi na omadhidhiliko ga faathana nopolio mondoolopa Windhoek, Rundu osho wo Gobabis. Ya ti, otuntila otayi gandjwa kaanona okuza pokanona opo ka valwa sigo omulongo. Uuministeli owa ti oshikonga otashi tameke momasiku 27 notashi ka hula momasiku 30 gomwedhi nguka.

“Oshikonga shika oshitatu, sho shotango noshitiyali ya li ya ningwa moomwedhi dha zi ko,” ya shanga ngaaka. Uuministeli owa pandula oshigwana sho kwa li sha fala aanona molweetho lwotango nolutiyali, taya ti, oopelesenda 91, dhaanona odha tuntilwa. “Onkene otatu hiya olweetho nduka natango lu longithwe opo aanona ayehe ye li kohi yomimvo 10 ya ka tuntilwe,” ya kumagidha ngaaka. 

Uuministeli owa yelitha kutya aanona ayehe naamboka ya li ya tuntilwa momalweetho ga ziko natango naya ye ya ka tuntilwe. Oya ti omatuntilo otaga gandjwa piipangele osho wo puukilinika awuhe moshilongo naapangi yamwe otaya ka enda nomagumbo.

Uuministeli wuuhaku nonkalonawa okupitila momalongo gokukeelela opolio, okugamena aanona owa gandja omalongo taga ti, omukithi gopolio, omukithi omudhigu hagu etwa konkuni unene tuu maanona, nohagu vulu okweeta uulema ngaashi wokuligalala. “Ombuto ohayi ya molutu tayi pitile mokana e tayi indjipala momandjandja,”ya shanga ngaaka. Ya ti, opu na omaludhi gatatu gopolio, ga tulwa moongundu. 

Eyigameno, ogo omukalo tagu longithwa okukeelela opolio. “Olundji omandhindhiliko ohaga holoka pokati kuule womasiku okuza pugatatu sigo opugatano,” ya nyola ngaaka. Ya ti, opolio unene ohayi zi pomahala mpoka pwaa na uuyogoki newopaleko li li nawa, nuunene aanona mboka aashona ohaa kala ye li moshiponga. Ya fatulula kutya ombuto yuuvu wopolio ohayi taandele tayi pitile miikulya nenge momeya gokunwa ngoka ga nyatekwa kombuto yopolio. 

“Ombuto yopolio otayi vulu wo okutaandela tayi pitile monyata yi na ombuto nenge miikunguluki yomomuligu,” ya ti ngaaka. 

Uuministeli owa shanga kutya omadhidhiliko gomukithi gopolio ongaashi okufudha nuudhigu, olwiidhi, eloloko ano okuvulwa kwa pitilila, okupwatuka omutse, okukunga, othingo tayi kukuta osho wo uuwehame momaako nenge momagulu. 

-vkaapanda@nepc.com.na