Israel okwa hala okukutha oonkatu dha kindja, mwa kwatelwa okulaleka Aaeritrea mboka ya li moshikumungu shiikolokosha moTel Aviv mOlyomakaya. Aantu ye thike po170 oya li ya lemanene miikolokosha ya li pokati kAaeritrea nopolisi yaIsrael, Aaritrea mboka otaya yambidhidha oongundu dhopolitika dha yooloka dhokoshilongo shawo. Omuprima gwaIsrael Benjamin Netanyahu okwa ti omusinda omutiligane ogwa taagulukwa. Okwa pula wo pu tulwe omilandu omipe okutsa Aa-africa iilyaalyaka, mboka ta ti oye li moshilongo shaa li paveta. Iikumungu yOmolyomakaya oya tameke konima sho aahwahwameki ye li ompinge nepangelo lyaEritrea ya ti oya li ya pula epangelo lyaIsrael lyi kaleke oshinyangadhalwa sha li sha unganekwa kombelewa yomukaleliposhilongo gwayo. Oya li ya teyagula po eyinda lyopolisi ndyoka lya li poshiindingili shoka. Opolisi ya zala iikutu yokwiigamena oya li ya umbu ohaasa osho wo ooholo dhodhene yo ya londa koonkambe taya shunitha aantu monima. Opwa patululwa omapekaapeko ga tale ngele elongitho lyooholo olyi li tuu momilandu dhekotampango.
Opwa li wo omaipumpomumwe momapandaanda pokati kAaeritrea, taya dhengathana niikuni, niitenda osho wo omamanya. Oya li wo ya tatula mo omakende goohauto nogoositola.
Omatopauko ngaka mokati kAaeritrea oge na sha nepangelo lyaPresidente Isaias Afwerki, noga ya sigo omuupongekwa, nomakuyunguto ngaka kage shi gotango muule wiiwike ya zi ko. Aakalimo oya ti omapandaanda gaTel Aviv oga li ga fa ge na iita yamatutu uule woowili dhontumba, nomadhagadhaga gopolisi ga li taga dhana onkandangala mewangandjo.
Minista Netanyahu opamwe nokabinete ke oya gandja ombedhi kompangu ya shiga ko moshilongo sho ya li ya indike onkambadhala yonale yokuundula mo aakwiilongo muIsrael.
“Ngashiingeyi ope na uupyakadhi uunene waakwiilongo yaa li paveta moTel Aviv osho wo omahala galwe moshilongo,” Omuprima osho a lombwele oshigongi shontomenawina shepangelo mOsoondaha.
“Otwa hala aakolokoshi ya gandwe, mwa kwatelwa oku ya tidha mo moshilongo, unene tuu mboka ya kutha ombinga.”
Okwa li a pula oominista dhi mu pe oondungethaneko nkene ye na okukutha mo aakwiilongo ayehe yaa li paveta moshilongo. Minista gwompilamena Itamar Ben-Gvir okwa t iota ka gandja omatompelo ge opo aakwiilongo ya tidhwe mo, t eke ga gandja mopaliamende. Otaku tengenekwa kutysa omu na aakwiilongo Aaeritrea ye li muupomgekwa muIsrael ye li 18 000, moka oyendji ye yam o shaa li paveta sho ya taaguluka omulonga gwaSinai moEgypt. Oya ti oya yi ontuku molwomapangulo giipundjamenye, osho wo omahepeko galwe koshilongo shoka osho shimwe shin a ooveta dha yaga kegonga muuyuni. Sho Eritrea ta tyapula oomvula 30 dhemanguluko okuza muupika waEthiopia, opwa kala nokuunganekwa iiytuthi oyindji muupongekwa. Ashike nande ongawo, iituthi mbika ngaashi moIsrael, Europe noNorth America oya talelwa po komakuyunguto, omwedhi gwa zi ko, oshiindingili sha li koCanada osha li sha kalekwa molwiikolokosha.
-BBC