OKONGO – Jonas Nghihepavali, oye umwe womanyakwa haa tange eengobe osho yo okulitanga yemwene nelalakano lokumwenyeka oshiwana.
Omulumenhu ou weedula 34, okwa dja komukunda Onkumbula moshitukulwa shaShikoto.
Okwa ti okwa putukila peengobe omo a kala alushe e li naxekulu kohambo nopeumbo.
“Tatekulu okwa tekulila nge oulumenhu noilonga yomepya. Ke hole omavaya. Okuhole omunhu ta pitile ongula koshuunda sheengobe nelalakano lokutala ngeenge eengobe oko ngaa di li ile oda pumha ko,” ta ti.
Olomakaya pefimbo louvalelo wowina womaludi wa li kOkongo, Nghihepavali okwa nhukila mondabo okumwenyekwa oshiwana eshi kwa li te litange.
Ovanhu aveshe okuye ashike kwa li va tala shaashi mondabo omwa nhukila enyakwa. Oomeme ova tameka tava kuwilile omanga ootate okwa li tava kaluka vo tava yolo eshi Nghihepavali te litange. Shamha ngoo kwa tiwa “omulumenhu ou olye ou” ye Nghihepavali okwa tameka okulitanga, ye ta komona komutwe. Omulumenhu okwe li a tanga oule wominute nhano ina fuda po. Oshiwana okwa li sha ufwa koshipundi molwaashi omulumenhu ou oku na ounongo wokupopya. Onguloshi tuu oyo, ovanahambo vakwao osho va fikama okuyambidida omunahambo mukwao ndele tava nuka tava ti “Omulumenhu okuhole okukala popepi neengobe”. Ngaho okwa li nee tava xwaxwameke nokutwa Nghihepavali omukumo wokulitanga.
Nghihepavali okwa ti natango ota ka holoka koshivilo shomaludi opo a mwenyeke oshiwana.
“Ohandi ke ya noitangomwa ya yooloka omo handi ka tanga eengobe deemhedi, eedidi osho yo ongobe dingi ei tai ka findana omaludi,” ta ti.
Okwa ti ye ke shi evaya shaashi oku na eengobe osho tashi ulike kutya omulumenhu ongobe.
“Onda pandula tatekulu eshi a tekulila nge oulumenhu. Ngeno ka li po ngeno osho naame kandi shi okutanga eengobe,” ta ti.