EDUNDJA – Ofamili yaminista mukulu woyeendifo noilonga, nakufya Errki Nghimtina oya hokolola tai ti oya kanifa ongudi yepata, omulumenhu omunambili noku na oukumwe.
Nghimtina okwa xulifa Osoondaxa efimbo lomutenya meumbo komukunda Edundja moshitukulwa shaHangwena.
Okwa li e na omido 78.
Okwa li oshilyo sheumbo lomutumba wopashiwana okudja omudo 1995 fiyo 2020.
Omaandaxa Omupresidente mukulu Hifikepunye Pohamba okwa talela po oshiumbo shaNghimtina.
Okwa li a enda pamwe nelelo loshitukulwa shaHangwena mwa kwatelwa omalelo opamifyuululwakalo.
Velinase Nghimtina weedula 80 ou e li omukulu waminista mukulu okwa hokolola ta ti okudja ashike efimbo tava putuka ondenge yaye oya kala i na oukwatya uwa tau ulike ouleli.
“Erriki ke shi evaya kwa li. Okwa li omulumenhu e hole oilonga nelandulafano,” ta ti.
Okwa hokolola ta ti Nghimtina okwa li omulumenhu e na omaano molwaashi ka li ha dopa mofikola.
“Alushe okwa li ha piti e li ponomola yotete naashi osha eta opo a ka longe ofikola fiyo a ka mona eenghatu dopombada moilonga yaye,” ta ti.
Okwa weda po ta ti Nghimtina ka li e hole eendenge daye tadi shindwa.
“Ohandi lili ondenge yange twa putuka nayo tu na ombili. Tulumukwa nawa nombili ndenge yange,” ta ti.
Okwa fiya po ounona vaye 19.
Ounona vaye ova hokolola tava ti xe okwa li omulumenhu ehe na okatongo molwaashi meumbo laye okwa li tamu tekulwa ovanhu vahapu.
Ova ti xe omulumenhu kwa li a fimaneka ehongo shaashi okwa li e na ohokwe yokutuma ounona vaye kofikola.
Ovashiinda shaye ove mu tanga tava ti okwa li omulumenhu e na ekwatafano liwa novashiinda.
Omalongekido epako laye oku li metifa.