Mugara kavadimuhamatere konyima opo vaporosi kavakonderere ehauto eli vana kugazarera asi kuna simbi nyama zokuvaka posiruwo oso kava kere nekeverero mononzira koruha oku vana kutumbura asi Western Bypass Road (B1) moVenduka moutano una puko. Ogu kankondopekere simpagwa sangesi kuna kara ogu gakara nosinka sonkrapamwe momukunda Khomas Chief Inspector Katrina Naukushu katente asi ekwato lyomuntu ogu kuna wizirepo morwa efukunyo kali kere lina wapa eli kavarugene morukanda rwaHochland Park.
‘’ Vatareli nonzira kavakere tavagendi mononzira odo makura awo yipo nye kavamwene ehauto lina simbi nyama. Aga gavali mahauto kagakere gana kugendesako eli lina simbi nyama apa nye kavayayidimbwilire asi vaporosi kuna kuvakwama, awo yipo kuduka vasige olyo lina simbi nyama,’’ yimo ana kutanta Naukushu.
Age kagwedereko asi musingi ogo kasingire ehauto lina simbi nyama gelike kavakwete, ano ava vasingi womahauto gavali owo kavadukire.
Mokukwama Naukushu, ekona kono lyontateko lina tameke, nomu vana kuyimona nare asi nyama ezi kuna kuzigazarera asi zokuvaka. Nokutanta hena asi nyama kapi vana zihuwu, kwazitetagura ngooro noyipapa.
Simpe ngorooro nosimbilingwa sazo eyi nayirerupika nye mokukona kona vagwane oku zina tundilire. ‘’ Ekona kono nalibubuka tupu yipo vadive asi yilye mwenya nongombe ndi ngombe.
Ose nare tuna tameke kugwanekera kumwe novamusinda nomukunda dimwe yipo tutare asi zene ezi ngombe ndi nyama kupi zina tundilire,’’ yimo ana kutanta. Nsene asi mwenya ngombe tuna mugwana, nyama ozo tatuzitengwida kwendi , yimo ana kutanta Naukushu.
Age katente asi elikwamo dona eli lyokuvaka nongombe ndi yimuna kuna kara lyedona unene, alyo hena lina gumu vanandima womoNamibia, unene vana kuweka nongombe. Apa nye ana kugava magano aga vana kara nago vaporosi mokurwanesa ukorokotji ndi widi, age katente asi vaporosi simpe navatwikira ngorooro kuruganena kumwe novantu ava vana kara asi vanafarama mepitiro eli vatulisapo lyokukandana umbondo mokambunga kawo. ‘’ Ose kuna kugwanekera kumwe novanafarama.
Ose kurugana nombunga vatulisapo vana farama ndi asi Union, vana farama wokurwanesa ukorokotji ntani mbunga ezi zokulivatera zovamusinda, yimo ana kutanta. Nampili ngoso, age katente asi vaporosi kapi vana kara noyiruganeso yina gwanene. -Nampa