Auleria Wakudumo 

Omukulunhuwiliki mouministeli weedoolopa nomayakulo okomikunda Daniel Nghidinua pamwe nelelo lodoolopa yaNdangwa ova yandja omaumbo eli o64 koovene Etinhe. 

Omaumbo okwa a tungwa kehangano loNational Housing Enterprise (NHE) moExtension 25 mOndangwa. 

Omaumbo okwa tungi lwa opo okwashiwana ovo ve na oyuuyemo ili pedu naai yopokati va dule okulanda omaumbo. 

“Epangelo onghene tali twikile okutula omhumbwe yomaumbo komesho opo li kandule po oluhepo nouhafike pamwe oshoyo exumokomesho moshilongo,” Nghidinua ta ti. 

Nghidinua okwa indila omalelo eedoolopa opo a twikile okulongela kumwe nomahangano okutunga omaumbo ngaashi oNHE oshoyo oShack Dwellers Federation of Namibia mokuyandja edu tali tungwa kombilixa komahangano aa opo a dule okutunga taa dulu okulandwa kOvanamibia ava vena oyuuyemo ili pedu. 

“Eshi otashi kwafele okukandula po etoto lomalukanda mahapu moshilongo  omo ovanhu veli mo vehena eameno, eemhumbwe defiku keshe ngaashi olusheno nomeva oshoyo omaumbo eheli pamufika womaumbo oshinanena,” Nghidinua. 

Omunashipundi mehangano loNHE Toska Sem okwa holola ta ti omaumbo a tungwa mOndangwa okwa pwa okutungwa molwa elongelo kumwe lelelo lodoolopa yaNdangwa. Sem okwa ti elelo ola endelela okuyandja edu koNHE nehangano ola kwashilipaleka kutya omaumbo okwa tungwa pefimbo opo oshiwana shi mone omaumbo. “Omwaalu wovanhu okudja komikunda va uka kodoolopa owaya pombada paife. Eshi osha fimana okutunga omaumbo ombilixa opo ovakwashiwana va kale havadi momaumbo eli pamufika wopombada nokuna ombilixa,” Sem ta ti. 

Ta popi ponhele yaava va mona omaumbo mape, Lucia Heita okwa holola olupandu koNHE nelelo lodoolopa yaNdangwa eshi va ninga eendjodi davo oshili. Heita okwa ti momusholondodo womadina ina kala mo efimbo lile. “Onda ninga eindilo odula yadjako muOctoba naDecema ndele eshi Januali ekeya, onda dengelwa nale kutya eumbo lange ola pwa nale okutungwa,” Heita ta ti. wakudumoauleria@gmail.com