Auleria Wakudumo 

Omupresidente Netumbo Nandi-Ndaitwah okwa ulika oongoloneya vape voitukulwa iheyali. Oitukulwa ya mona oongoloneya vape ongaashi oshitukulwa shaKhomas, Kavango East noKavango West, oKunene, Oshikoto, Hardap noshitukulwa shaTjozondjupa. 

Oongoloneya vape ovaya koshipundi sha landula eshi vamwe va ya komutumba wopashiwana. 

Oongoloneya vape 

Ngoloneya woshitukulwa shaKunene Vipuakuje Muharukua, a pingena po Marius Sheya. 

Ngoloneya woshitukulwa shaKavango East Hamunyela Hambyuka a ya ponhele yaBonifatius Wakudumo.

Ngoloneya woshitukulwa shaKavango West Verna Sinimbo ta pingene po Sirkka Hausiku.

Ngoloneya woshitukulwa shaShikoto Sacky Kathindi a ya ponhele yaPenda Ya Ndakolo. 

Ngoloneya woshitukulwa shaHardap Riaan McNab a pingena po Salomon April.

Ngoloneya woshitukulwa Otjozondjupa John //Khamuseb a pingena po James Uerika.

Ngoloneya woshitukulwa shaKhomas- Sam Shafiishuna Nujoma Jr a pingena po Laura McLeod- Katjirua

Va wedelwa ko 

Oongoloneya voitukulwa iheyali inai tumbulwa, ova wedelwa ko eemwedi nhatu komesho mombelewa. Oongoloneya va wedelwa ko ongaashi ngoloneya woshitukulwa shaShana, Ohangwena, Omusati, //Kharas, Zambezi, Erongo, nangoloneya woshitukulwa Omaheke. 

Oilonga yavo yopambelewa oyali ina okuxula momafiku 20 Malitsa neudo. 

Omupresidente a dja koshipundi Nangolo Mbumba oye a shaina omushangwa ou tau pitike oongoloneya va twikile noilonga yavo fiyo omuJuni neudo. 

Nangolo okwa holola ta ti eshi okweshi ninga opo a yandje omhito komupresidente Ndaitwah oo aya koshipundi mo21 Malitsa neudo opo a kale ena efimbo okutokola oongoloneya vape ovo tava ka longa naye. 

-wakudumoauleria@gmail.com