Otjiṱiro Otjindjandja nai katji nomuhunga mena rohoromende nandarire kokutja nguri motjihavero nai, Omutjuṋikwa tja haama mutjo wa tja kape tji na enyando.

Omuhaamise wOkomiti yozombara za Kandjoze, Mbakumua Hengari ma tja. Ama raisa kutja momayandero wombura ndja zuko ohoromende ndja zire po kehi yOmuheṋendu Nangolo Mbumba ya yakura Omeritwapero wApamwe, Ojoint Decclaration (OJD) pokati kozohoromende azeembari ya Namibia nOyehi rOvandoitji. Wina tjeri otjiṋa tji tji hi na ongahukiro kutja omayakuriro nga maye hee ye nu ye heya tjike nu ondjira komurungu okuza momayakuriro nga ya sana pi nu mai sana pi? 

Netumbo Nandi-Ndeitwah (NNN) tje yere komananeno mbye uhara ama ravaere nokutjita omambo uriri morupanda nge tja u nomaundjiro kutja ozohoromende azeembari nḓa maze hakayenene ndjirakati. Kutja nambano eye hapo u ri mondjira indji ndja kewa i ingwo wokomurungu we poo indee eye ngamba ke eya pehi. Oyo ndji ri indji OJD. Okutja Hengari otji ma tja oruveze rwa horo eye okuya pehi porwara nokuriraisa kutja hapo ohoromende ye epu indi ya tye okuhungamisa pi. Okuiisisra komambo we nge tja: ‘nambano kape tji na enyando rukwao.’ 

Hengari ma hitasana nOnongo PLO Lumumba ngwa hindire orutuu kOkomisi yOruwano rwa Afrika ama raisa kokutja ombura iri pokuyanda nu tjii hapo oruyano rwayo rokutja ombura ndji oyousemba kovakwatera va Afrika okutuurungira mOtjisuta okururi maru yenene nomieze vine uriri mbya sewa ko? 

Oro wina nai nda rira eimburirio ra NNN nandarire katjisupi momayandero womueze mbwa zuko peyuva rOvakazendu va Afrika eye tja raisire kutja mave sokutunduuza okutuurungira mOtjisuta. “Omutjuṋikwa Nandi-Ndeitwah omueze mbwa zuko we rizemburukire nomayuva ye esere (100) momberoo. Posi ya ke na indi kaparukaze wa tamunine, otja kourizemburuka wetu ourisusupareke, epu nde tumuna kutja irimwe romapu omamwatemwate wohoromebnde ye ombe, ndiri Otjiṱiro Otjindjandja, ondjesiro nOtjisuta,” Hengari ma tja. Na weza kutja mouatjiri otja kuwo otjiṋa hi kuwo kahepero nu opu tja sere okusirira otja nai tji tja sirira.