OMAFO – Hamushangadjai woSwapo Sophia Shaningwa okwa ti omuulikwapresidente woSwapo Netumbo Nandi-Ndaitwah ina kulupa nokuninga omupresidente woshilongo.
Edi Shaningwa okwe di popya pefimbo loshikonga shoSwapo sha li kOmafo mexuliloshivike.
“Netumbo omuleli muwa noku na olukeno noshiwana. Onghee ota dulu okulela oshilongo,” ta ti.
Netumbo Nandi-Ndaitwah oye omuulikwahoololo woSwapo ta ka kufa ombinga momahoololo opaupresidente.
Omahoololo oku li ko neudo momafiku 27 Novemba. Shaningwa okwa lombwela oshiwana opo shi xulife po okupopya omahokololo oipupulu kutya Nandi-Ndaithwah okwa kulupa nokuninga omupresidente. “Xulifei po okutuka ovaleli unene tuu omulikwa woSwapo Netumbo,” ta ti. Okwa ti Swapo ongudu yakula i na ovaleli ve na elandulafano nelongelokumwe.
“Swapo oku na ashike okufindana neudo. Fyee inatu tila eengudu domhilameno,” ta ti.
Okwa weda po ta ti Swapo ongudu i na olukeno noshiwana molwaashi oya yambidida oshiwana nokutunga oshilongo.
Okwa kumaida ovayambididi voSwapo opo va longe nondjungu okuninga oikonga yoSwapo momidingonoko.
Shaningwa okwa lombwela oshiwana opo shi kwate nawa oukalata wavo vomahoololo shaashi ova fimana.
“Indeni momwaalu muhapu mu ka hoolole Swapo molwaashi ei oyo ongudu tai eta omayakulo koshiwana,” ta ti.
Shaningwa okwa kumaida ovanhu ovo tava ka kalela po Swapo koukefa wokuhoolola opo vaha kofe noshoyo vaha ninge oufelende novanhu va dja keengudu domhilameno. “Ovanhu otava ka kalela po Swapo koukefa wokuhoololela otava ka pewa oikulya nomeva a wana,” ta ti.
Pefimbo e li koshikonga shoSwapo, Shaningwa okwa lombwela ovanhu ta ti kutya yee ita kongo omushamane moSwapo ashike ota longo oilonga yaye.
“Olyelye e mu lombwela kutya kandi na omushamane?” ta pula.
Efiku olo ovanyasha 20 ove liyandja koSwapo va dja keengudu domhilameno.
Ova dja keengudu ngaashi IPC no-NEFF.
Shaningwa okwa li e va tambula ko pambelewa noku va pa oukalata voukwashilyo woSwapo.
Ngoloneya mukulu waHangwena Usko Nghaamwa okwa lombwela ovanyasha opo vaha pukifwe keengudu domhilameno.
“Otamu lombwelwa oipupulu kutya otamu pewa oilonga. Navo otava kongo oilonga shaashi kave i na,” Nghaamwa a lombwela ovanyasha.
-fhamalwa@nepc.com.na