Omupresidente Netumbo Nandi-Ndaitwah okwa kumagidha kutya onzapo okuza kiiputudhilo yopombanda oha yi ulike uulongelwa, esimaneka, eyitule mo osho wo onkatu yomuntu, onkene ina mu etha muuvithweko kutya onzapo kayi shi sha.

Nandi-Ndaitwah okwa popi ngaaka meehulilo shiwike sho kwali taku zalekwa omaguwo   koshiputudhilo shopombanda shuunongononi niikwaingomba koWindhoek. 

Aalongwa yeli 2,962 oya zala omaguwo nokumona oonzapo miimpungu ya yooloka okupitila moshiputudhilo shopaungomba uunongononi niikwaingomba.

“Otandi kumagindha aalongwa ya mono onzapo nena ya kale oshi holelwa oshiwanawa sha yakwawo taye ya mosikola ndjika. Shoka mwa ulike nena otashi hokitha notashi popi oshindji kombinga yoshilongo shetu,’’ Nandi-Ndaitwa ta ti  ngaaka.

Ta ti, eyilongo lyawo hapo tali huulile mpoka, ihe naya tsikile natango ya gandje wo oshiholelwa kwaamboka taya zi konima. 

Omutse gwoshilongo Nandi-Ndaitwah okwa fatulula wo kutya uuna oshilongo shina aantu ya longwa, nasho ohashi humu yo komeho, shoka tashi kokeke eliko lyoshilongo osho wo okukandula po oluhepo.

Aalongwa esiku ndyoka okwali ya ulike enyanyu, omanga yamwe ya popi kutya ondjila ka kwali ompu ashike oya thiki mpoka yali ya hala.

Maria Shivute ngoka a mono onzapo yoDegree mokwaandjaneka uyelele okwa ti ehokololo lye ekumithi ashike ewanawa oshoka okwa pondola shoka yamwe inaavula okushipondola.

“Okwali ndina okukala nda mana osikola omimvo 10 dha piti, ashike onda ka panda yuuyuni etandi thigi po osikola, ashike onda ka mona kutya hoka kuna onkalamwenyo yandje okosikola. Onda shuna kosikola, nena ongame nguka nda mana osikola yandje,” ta popi ngaaka.

Ta ti, yamwe a thigi po osikola pamwe na ye, inaya za mo natango mepuko, ina ya pukuluka natango oshoka oyiitala kutya itaya vulu we okulesha omambo omanga yamwe ye wete taya mana po ethimbo.

Gumwe natango a mono onzapo Esther Shipanga, okwa ti okwa kondja sigo a sindana, okwali ta longo iilonga oyindji pethimbo limwe. 

“Iilonga, ohanona yandje, iilonga yomegumbo nosikola onda kala noku yi kwatelwa kumwe pwaa na luthuwo, inashi kala oshipu, ashike onda sindana,” Shipanga ta ti ngaaka.

Ta ti kapena shikukutu shaa hulu.

– vkaapanda@nepc.com.na