Namibiab Studentn Marisi Mâxōǀkhās ǂGaes (NSFAF) ge ra ǂnoabasen ǁnā mîǁguib hîas ge a ū in ǁnā studentn hîa kaiǀoa hân tsî !âidi !nâ-ū ge !kharu tsî ǂhanub xa marisise ra mâ!gâhe ǀgapi ǁkhāǁkhāsen!khaigu tawa ra ǁkhāǁkhāsenn ǀguina ra hui tsî ǁnān hîa aitsama mâbasen ǀgapi ǁkhāǁkhāsern!khaigu tawa ra ǁkhāǁkhāsena marisise hui tamas ǂnamipe.
Nēs ra saos ge ǁnāti ī ǂkhîb ǀnopaǁnâdi tsî ǂkhîo!nâsib ǂhaweba ǁkhaeǁnâs hîas ge Namibiab Studentn ǂNûiǂgāsa(SUN) ūhâ i tsî NSFAFs di ǂnûǁkhaeba ra Sîsenǂui ra Mâisab, Kennedy Kandumeb di ūǁnâhesa gere ǂgao!nâsa xu ra !hui. “ǀGui timî tsîb ge Kenndy Kandumeba nē !haros !nâ a sîsentsoatsoasa xus ge NSFAFsa îbe ge khao-oa, ǂgui studentn ǁnāti ī !ēs ǁkhāǁkhāǂuisens disa ra ǀhanahe amaga,” tib ge nē ǂkhîo!nâsib ǂhaweba gere khomai.
Ai!â noxopa hâ ǀhapiǂgā-ams Kandumeb !oagus ge, ǁîb ge a ǂkhāsa !aruǀî ǁnā studentn hîa diplomaba ge ǁkhāǁkhāsentoa tsî ai!â xrati !nâ ǁkhāǁkhāǂuisens !aroma marisihuib ǂganamsensa ra dīn nî huihesa, koman ǁîna xrat 12 di koro ǁkhāǁkhā!âgu !nâ 25 !gôaba ge hō tama i amaga.
Nausab, ge Olavi Hamweleba nē ǀhapiǂgā-amdi hîa ǂnûǁkhaeba ra dana sîsenǂui ra mâisab !oagu ra dīhede ǂhara tsî ge mî, ǁîn ǀgui amab tsîna !khōǂgā tama hâsa. Hamweleb ge ge mî, NSFAFs ǁguisa ǂhanumās tsî ǁgaragu !oagu a sîsenxasa, ǁîgu hîa mâsigu ra īse a unuhe ǁkhāga. ǁÎb ge a mîs ge nē ǂkhîo!nâsib ǂhaweb xoa-ao-i ge NSFAFs ra ǂhanub ǀgapi ǁkhāǁkhāsen!khaigu (Unams, NUSTs tsî Namcols) studentna marisihuiba ra mās !aroma.
Hamweleb ge ge mî, kaisen khoena !gāsase nî ǁnâu!āsa, NSFAFs di mā!hūs ǂgurose ǀgôan hîa xrat 12 ra !kharun, koro ǁkhāǁkhā!âgu !nâ 25 !gôab ǀkhana. ǁKhāti noxopa a ǂâi!nâǁguihe ǁkhān ge ǁnān hîa 22 !gôaba xrat 12 !nâ ūhân tsî !aruǀî diplomab !nâ ra ǁkhāǁkhāǂuisen ǂgaona.
Ai!âb gere !gāsa kais ge khoen hîa 23 kurin tsî ǁnās xa !nāsa kurina ūhân tsî ai!âkam sîsenni ǂans !nona kurin disa ūhâ xrat 12s ǀkha tamas ka i o koro kurigu ai!âkam ǂansa xrat 10s ǀkha ūhân tsîn marisihuiba māhes !aroma a ǂâi!nâǁguihe ǁkhāsa.