ONGWEDIVA – Ngoloneya woshitukulwa shaHangwena Sebastian Ndeitunga okwa tanga Omukokolipresidente Sam Nujoma ta ti ka li e hole ovakwaita vomavaya.
“Okwa li e hole ovalumenhu ve litumba nove na ondjungu nohokwe yokuya moita va ka lwife eembulu,” ta ti.
Ngoloneya okwa weda po ta ti Nujoma ka kwa li e hole ovanhu ve na onyalo, omo kwa li a popi ta ti omunhu ngeenge oku na onyalo ita dulu okulwifa eembulu.
Ndeitunga okwa ti okwa shakeneka Nujoma omudo 1975 moAngola pefimbo lekondjelomanguluko.
“Pefimbo olo moAngola okwa li mu hadi ovakwaita vahapu va dja koNamibia tava pewa omadeulo,” ta ti.
Okwa weda po ta ti Nujoma okwa yandja omhito kovakwaita va pewa omadeulo nelalakano ve lilongekide okulwifa eembulu.
Ndeitunga okwa ti naye okwa li a kwatelwa movakwaita ovo kwa li tava wilikwa kuNujoma moAngola.
“Nujoma omuleli muwa, omulumenhu kwa li e na omukumo newilikiko liwa lokukwatela ovakwaita komesho,” ta ti.
Okwa ti Nujoma okwa li omulumenhu e hole elandulafano molwaashi pefimbo kwa li ve li mekondjelomanguluko okwa li va tulwa melandulafano.
“Pefimbo Namibia a manguluka Nujoma okwa ulika nge opo ndi ka ninge omuyandjimayelele kuHifikepunye Pohamba pefimbo a li minista woikwameni nomataulukilo okeengamba,” ta ti.
Okwa ti Namibia okwa kanifa epandafule, omulumenhu kwa li e hole oshiwana shaye.
“Nujoma ka li e na oukwamuhoko shaashi okwa hanganifa ovanhu vomihoko da yooloka,” ta ti.