Auleria Wakudumo
Erongo Regional Electricity Distributor (ErongoRed), ehangano lolusheno otali ka tula olusheno loshali momaumbo 1 838 moshitukulwa shErongo okutumbaleka Omukokolipresidente Sam Nujoma.
Otaku hokololwa okutula olusheno loshali mErongo taku ka kosha ongushu yoshimaliwa shi fike peemiliona N$66.8.
Eshi otashi ka ningwa vati moule weemwedi nhee.
Olusheno loshali otali ka tulwa momaumbo e li mOswakopmund, Walvis Bay, Usakos, Karibib noHenties Bay.
Omukulunhuwiliki mErongored Immanuel !Hanabeb okwa holola ta ti olusheno kali shi ashike oshipumbiwa shefiku keshe ashike ohali kwafele mexumokomesho, mehongo nomokuyambula po eliko loshilongo.
“Ovanhu ohava ti omeva oo omwenyo, ashike olusheno olo Kamana kaNdongo monghalamwenyo. Ohali kwafele ounona okulesha, eengeshefa di xume komesho, novakwanedimo va pungule oikulya yavo meameno,” !Hanabeb ta ti.
!Hanabeb okwa weda po ta ti otava ka kwafela yo eengeshefa dinini naadi dopakati mokuyandja olusheno eli.
Okwa ti eshi otave ke shi ninga mokutula olusheno peenhele domangeshefelo eengeshefa dishona nodopokati.
“Otu na ovahondji voikutu, ovakululi, noovene voufitola vashona hava longifa ashike okakefa kamwe kolusheno nosha pumbwa okulunduluka,” !Hanabeb ta ti. Mayola wodoolopa yaSwakopmund Blasius Goraseb okwa holola ta ti otava ka longela kumwe nErongored okuyandja ouyelele womaumbo aeshe taa ka pewa olusheno.
Goraseb okwa ti nonande omhumbwe yomalusheno tai ende tai kandulwa po, natango oumbudi yeengodi dolusheno onghene wa uka komesho osho hashi i oilonga yexumokomesho moshipala.
“Pokati ko2018 no2024, eengodi dolusheno da konda 100 oda lopotwa mErongo. Eshi osha pula ErongoRed vati eemiliona da konda poN$5.