Auleria Wakudumo
Omukulupe weedula 64 okwa xulifa sha dja eshi a kutulwa omunino komona moshitukulwa shaHangwena.
Oshiningwanima eshi osha ningilwa momukunda Okapumbu moshikandjohoololo shaNgenga.
Nakufya okwa tongololwa oye Samuel Nekoto.
Edi oda kolekwa komukulunhu koshikondo shokukeelela oimbuluma moshitukulwa shaHangwena Deputy Commissioner Bennet Muyambango osho yo kansela woshikandjohololo shaNgenga Matthew Shikongo.
Otaku hokololwa Nekoto va li hava di meumbo ovo aveke nomona oo ta feekelwa e na ounghundi wopamadiladilo.
Otaku hokololwa nakufya nomona va li tava lu shaashi meumbo omwa hangika omakodolo osho yo oikulumbwati.
Nekoto okwe ya vati okulituwa kovanhu ovo have ya okulimina oimaliwa mepya laye.
“Ovanhu eshi ve ya okulima, ova kala vati nokudengela omusamane ashike ita kufa po ongodi yaye. Konima, ova ka uda ongodi yaye tai kwena monduda nova shiivifila ovashiinda ,” Shikongo ta ti.
Otaku feekelwa vati nakufya a xulifa Etivali momafiku 11 Januali 2025 nokwe ya ashike okulituwa efiku la landula ko Etitatu.
“Onghundana oye tu halula moshikandjohoololo neenghono. Ohatu halele ovakwapata vaNekoto ombili pefimbo eli lidjuu,” Shikongo ta ti.
Shikongo okwa kunghilila oshiwana ngeenge shi na ovakwanedimo vavo ve na ile tava fekelwa ounghundi wopamadilaadilo opo vaha kale momaumbo ovo aveke navo.
“Meumbo namu kale ngaho ovanhu vatatu ile ve dule po opo pamwe hatu dulu okukwafela ngeenge eenhamanana da holoka pokati kavo,” Shikongo ta ti.
Omufekelwa otaku hokololwa a faduka po konima yokulonga oshiningwanima eshi shikumifa.
Nande ongaho, omufekelwa okwa tulwa moipandeko nokwa teelelwa a ka ningilwe omakonakono opamadiladilo.