OKAHANDJA – Mutoti naguhya vaNamibia Ndokotora Sam Nujoma, kakandwirepo mauyungo asi mbunga zaSWAPO zina zumbanesa magano gazo aga zakere nago monomvhura dakapita. Vamwe kuna kutanta asi epangero lyombunga zaSWAPO kapi zina kudiva asi yinke navarugana pomuhowo ntani yinke yinakukwamako. Monomvhura nadinye edi dina kapita nombunga mpatanesi kutanta asi mbunga zaSWAPO zina zumbana kapi zina kara hena nositambo ndi egano lyokukara asi vagave nayinye eyi vana pumbwa vantu. Mokupira nye kuliza noyo vana kuuyunga, epangero lyombunga zaSWAPO, narunye awo kutara asi yinke vana kurugana ntani asi yinke eyi lyarugana epangero neyi navakarugana monomvhura odo dina kuwiza. Nujoma kayipatanene oyo paapa kakere muyungi gomunene posigongi esi kakere naso momukunda godoropa zaOkahandja. Age katente asi epangero lyaSWAPO, nare lyangazara asi yinke navakarugana kerongo, uhaku, mambo, ryutjeno, mema gokuzera eyi kwakara asi yimwe vatura melikwamo lyawo yikare yokuhova. Age katente asi mbunga ezi nkenye apa azo kwasikama unene monomvhura edi vana pangere sirongo esi mokukeverera udemokoli ntani kutulisapo nye mavango aga gana kara asi gepangero ngavarugana navenye. Ose kwakeverera mpora, etakameso noukumwe ano kuyipakerera oyo ose twakara nye nelikwamo lyewa omu natukeverera runone rwetu. Age kageveko tupu yimwe eyi ana kumona asi yiyo varugana moOkahandja, kupitira mepangero lyombunga zaSWAPO, omu muna kara asi kwawapayika mema morukanda vana kutumbura asi “five rand” Oshetu 1 no2, nevango lyokutanta asi tusikameni kumwe lyokutunga noyimaliva yina siki koN$9 zonomiliyuna, oyo kwapitira nye melikwamo eli vaturapo lyaTIPEEG. Rutjeno oru runba kara asi sinkwa ntani varuhwameka morukanda rwaShetui 1 , 2 no 3 ntani tusikameni kumwe kwapuara yimaliva yokusika koN$6 donomiluyuna moomo melikwamo lyoTIPEEG.
Simwe somutaro katumbwire ezegururo matungo goyitora, eyi yakara asi kwareta yirugana kovadinkantu vetu. Nujoma katente asi eoangero lyaSWAPO,ngesi kunakara asi melikwamo lyokutunga mambo gomanzi ganavenye monomukunda dokulisiga siga. Elikwamo eli kwaliretesapo morwa kupira mambo vantu vetu ano ose kunakulimona asi elikwamo naligusapo ruhepo unene movantu ava ava gwana nzambi zonunu vatunga momarukanda. Elikwamo eli kwalimona asi kuna kugusapo udigu womambo ntani kuna kugava yirugana kovatungimo womoOkahandja. Dogoro ngesi mambo 400 govantu wokugwana nponzambi dononsesu kuna kugatunga ntaantani tupu vakahwiliremo. Ano mvhura ozo tuna yuka, kuna kara asi tavakatameka kevango limwe omu vanatulire ntere nomiliyuna N$6, vakadike mambo ogo. Okahandja ntaantani likakare evango eli notupungura nomutji detu domoNamibia, omu ngalikakara asi yipangero nayinye ngavagwana nomutji mevango eli. “Ame hena vanatanterenge asi makonakono nagenye gouvera tavakagarugana mosirongo setu kwato hena kutuma koSuid Afrika ngwendi mwanare. Yipo nye asi ame kuna kumuhundira asi mwahepa kuza mounzi weni namuvenye mo 28 November mukahoroewore mbunga zaSWAPO, kumwe nakandidate gwazo Ndokotora Hage G. Geingob, momahoroworo goupresidente nombongarero zanavenye. Ogu nye kakere tapurakane kesanseko lyaSam Nujoma mukurona godoropa Okahandja age hena mukwatakanesi gombunga zaSWAPO moOkahandja, Valerie Aron, ogu katente asi SWAPO nonompitisili dedi kuna lituramo nawa-nawa mokutara asi vapunguli vawize kumwe nokuretesapo yirugana moOkahandja. ‘ Moomu tupu twayidiva asi nkenye mupunguli kwahepa kukagwanamo Yuma konyima zezuva. Yipo nye asi mupunguli kapi ngatura yimaliva yendi modoropa ozo ana mono asi kapi muna kara mpora. Yipo nye hena asi modoropa zetu muna wapa, twahepa kulikwateni kumwe mawoko yipo asi turugane eyi yina tutumbukire ngovantu vamwe yimo ngoso vana kuyahulisa mbudi zawo.