OSHAKATI – Aanafaalama yamwe konooli oya holola enyanyu sho omvula ombwaanawa tayi tsikile okuloka konooli notayi ulike kutya nuumvo oku na eloolo. 

Omasiku gaali okuya metokalamumvo, omvula okwa li ya loko nawa miitopolwa oyindji yomonooli, shoka sha li sha nyanyudha aanafaalama oyendji, noku ya pa omukumo kutya nuumvo otaya ka likola mo sha momapya gawo. 

Veronika Ashipala gwomomukunda Emono moshitopolwa shaShana okwa ti oku na omukumo kutya nuumvo otashi ke ya endela nawa, oya ningi omimvo taya lili ondjala omolwomuloka inaagu gwana. 

“Shoka sha pumbiwa okulonga nuudhiginini, opo tu ka teye shoka twa kuna. Omagalikano otatu ga ukitha ashike kuPamba opo omvula kaayi loke sha pitilila, lyo efundja lyi ye lyi hanagule po omapya getu,” Ashipala ta ti ngaaka. 

Simson Fanuel gwomomukunda Onampinda moshitopowa shaShana okwa ti omvula sho ya lokele oshikando shotango okuya pevalo lyOmukulili, ka li a mana po ethimbo ashike okwa li a longo epya lye. 

“Omwedhi nguka otwa kala tatu limi, ombunda oya ningi esiku ya lala. Ondi hole okulonga kuyele oshoka omvula ihayi ithanwa onkene ngele onde yi itsu lumwe kandi hole oku yi hepitha,” Fanuel ta ti ngaaka. Okwa gwedha po ta ti, mepya lye ke na ombuto yoshikulya inaa kuna mo nuumvo, ta ti Kalunga ngele e shi pitike megumbo lye itamu ka kala ondjala nando. 

Aanafaalama yiimuna oya ti, oongombe dhawo otadhi monika nawa, dhimwe odhi li nale momategelelo. 

“Omashini oto ti ashike ino hala we, mOshiwambo ohaku ti, ongombe ohayi kala nomashini ngele yi li pekuta,” Thomas Kandala omunafaalama gwiimuna ta ti ngaaka. 

Ta ti, omvula ndjoka ya loko oya gwana manga, nongele otayi tsikile nayi loke ashike kashona tayi pititha po, oshoka ngele oya loko oyindji, itashi ka enda we nawa. 

-vkaapanda@nepc.com.na