ONGWEDIVA – Ovanafaalama vahapu monooli ova ti ohava kofa tava mbonyoka nonande haaveshe molweteteelelo leteyo liwa shaashi omuloka woneudo otau etifa eenghono. 

Umwe womovanafaalama Hafeni Aron okwa ti neudo natango ova taalela eloolo ngaashi odula ya dja ko, shaashi odula yaneudo inai fiya emanya la londa kulikwao. 

“Okutya ngaho fyee ava twe litetuka tu lime diva oilya yetu oya dala nale, yo oya hafa ashike nawa natango,” ta ti. 

Okwa twikila kutya petameko lodula yoneudo, natango omuloka owa li tau va endele nawa, shaashi vati odula oya li ya eta omafuma, osho yo eeshi odo da li tadi denge po omikaa moumambo. 

Anna Hango, omukalimo waHangwena okwa ti ye omuloka woneudo ihau mu kalifa vali oupafi monduda. 

“Onda longa lela noudiinini, nonde litetuka diva opo ndiha fyaale po kuvakwetu,” ta ti. 

Okwa twikila kutya ye oku na nale nokuli oilya ya dala, nokwa hala ngeno eshi ta ka teya, ota kufa po imwe opo a dule okunyangela oludalo laye. 

Manga va teelela eteyo la pama kuimwe yomoitukulwa konooli, vamwe otava keme, unene moshitukulwa shaMusati. 

Kavela Silas okwa ti vo inava mona lela omuloka wa kola neudo, vo vamwe oilya yavo inai dula okumena lela i kule shaashi ova lima olaata. 

“Oshili otwa tala ngaho momwene, osho yo mepangelo pamwe enongo taa fe ngaho ongobe ngeenge odula ya loko,” ta ti. 

-taimihaihambo2000@gmail.com