ETUNDA – Ofamili yOmukokolipresidente Sam Nujoma oya yandja pambelewa ofikola Etunda Primary School osho yo okapangelo opo i kale koshi yepangelo nokukala tai pewa oikwafifohongo. 

Oshindingi eshi osha li ko Etitano omo omunyekadi Kovambo Nujoma, ovakwapata osho yo omupedupresidente Lucia Witbooi kwa li va holoka. 

Ofikola okwa li ya tungwa omudo 2013 omo nakufya Omukokolipresidente Nujoma oye ei tungifa. 

Oya tungwa kongushu yoshimaliwa eemiliona N$25 noi li moule weehekita 15. 

Ofikola Etunda Primary oya tungwa i na omuhandjofikola wovanafikola osho yo okombifa yokutelekela. Omupudupresidente Lucia Witbooi okwa ti omudo tau ya ovanafikola 240 otava kala ve li momuhandjo. 

Okwa weda ta ti ovanafikola 100 oumatyona notava ka kala ve li momuhandjofikola. 

“Ovahongifikola 12 navo otava ka dja momuhandjofikola nelalakano lokutonatela ovanafikola osho yo okukala ve li popepi noilonga,” ta ti. Witbooi okwa ti Nujoma okwa li omulumenhu kwa li a fimaneka ehongo nokukala alushe ha popi kutya okaana keshe okaNamibia na ka ye kofikola. 

Okwa pandula omukokolipresidente molwoilonga iwa nokulonga nondjungu okueta po ofikola ei shaashi otai ka etela ovanafikola ouwa. 

Okwa kumaida ovadali opo va longele kumwe novahongifikola molwashi otashi kwafele ovanafikola ve lihonge nondjungu. 

Omupedu minista wehongo Dino Ballotti okwa ti epangelo ota li twikile okuyambidida ofikola Etunda Primary School. 

Kansela woshikandjohoololo shaTavi, George Garab pamwe nakansela woshikandjohoololo Otjozondjupa ova yandja oshimaliwa N$2000 shi longife okutula ko oluumbo lodalate kofikola. 

fhamalwa@nepc.com.na