Auleria Wakudumo
Ovahongi pofikola Helao Nafidi momukunda Oshiti shaHaihonya mOkongo ova li va hafa onga mbishi meumbo mwa tomwa eshi va tungilwa omaumbo pofikola.
Ovahongi ova ninga eedula hava di meembashu odo va dengela pofikola molwa oukokule wodoolopa nofikola ili mokati kofuka yaKongo.
Eumbo lovahongi lipe, olina eeduda hetatu omo nhee da nhuninwa ovahongi vovamati omanga dikwao dovakainhu.
Eumbo olina oduda yokutelekela, okandjuwo oshoyo eeshauna dokulikoshela doshinanena.
Ngoloneya woshitukulwa shaHangwena Kadiva Hamutumwa okwa holola kutya ekwa tokola okukwafela ofikola ei sha dja eshi ei talela po odula ya dja ko opamwe nOmukulunhu wehongo moshitukulwa Isak Hamatwi.
Okwa ti odula ya dja ko okwa mona nghene ovahongi ve li momhumbwe shili.
“Oproyeka ei oya pwa molwaashi twa pwilikina nokumona omakemo oshiwana shetu,” Ngoloneya ta holola ngaho.
Hamutumwa okwa ti oproyeka oya holola yo kutya ovanhu otava dulu okulalakanena shihapu ngeenge ova tula oukuni kumwe. Okwa holola olupandu kehangano loAffluentGen Group (ABT Panel Company) eshi olo lali kamana kandongo mokutunga eumbo lovahongi eli.
“Oproyeka oya tungwa kovanailonga vahamano ovo va pyokoka nawa osho yo 10 vopokafimbo ovo va dja pomudingonoko apa,” Hamutumwa ta holola ngaho.
Ngoloneya okwa ti ekwafo eli kali shi ashike okuyandja omatungo ndele okuyambidida ounhu womunbhu, okuxwepopaleka onghalo yomaumbo ovahongi nokukwashilipaleka kutya ova pewa omakwafo opo va pyokole okaana Okanamibia mehongo.
Hamutumwa okwa holola yo kutya otava ka tula moilonga opo va kwashilipaleke kutya ova wedela omuhandjo, okutula omaumbo moluumbo nokukwafela vali meemhumbwe dimwe.
Omukulunhufikola poHelao Nafidi Ndapunikwa Nghipandwa-Haukena okwa ti omaumbo okwa eta elunduluko lovahongi ovo va li hava di nale meembashu.
“Ovahongi vamwe unene ovo opo tave ya mowela ohava anye okulonga koushai molwa omashongo ngaashi aa,” Omukulunhufikola ta holola.
Nghipandwa-Haukena okwa ti ova mona nale ouxuna meembashu.
“Otwe li didimikila konyala eenghalo domhepo adishe okudja koutalala, kodula fiyo okoupyu notwa kala tuli moumbada wokudja meembashu. Paife, aishe ei okumupele noha tu dulu okufuda paife,” ta holola ngaho.
Omukulunhufikola okwa ti okudja monghalo ya tya ngaho onga ovahongi osha kala shi fifa ohoni. Nande ongaho, okwa ti ove udite omakemo avo a udika.
Ofikola natango oya pumbwa omuhandjo wovanafikola shaashi navo ohava di meembashu pofikola molwa oukokule womaumbo avo.
Kansela woshikandjohoololo shaKongo Efraim Shipindo okwa holola kutya otava kufa ehongo lokomikunda konima yefiya kashona nakashona.
“Ovahongi inava tula omutwe kepepe ile veli pule kutya katu na navo. Opo hatu tula kumwe kanini oko tuna po,” Shipindo ta holola ngaho.
Shipindo okwa kala nokuyandja ekwafo kofikola oyo tuu ei.
Okwa dengela ombashu pofikola oyo ya ninga omuhandjo wovanafikola 10 ovamati osho yo okuyandja oututa voukadona pofikola.
Natango, okwa ti ota twikile okukwafa ofikola.
-awakudumo@nepc.com.na