Omukulunhu wopolifi moshitukulwa shaShana Commisioner Naftal Lungameni Sakaria okwa hoololwa nokupewa onghatu yopombada, aka ninge omukulunhu woshikondo sheameno kOmbelewa yOmupresidente Netumbo Nandi- Ndaitwah. 

Sakaria okwa teelelwa aka hovele oilonge ipe mu 1 Mei 2026, koshilando pangelo. 

Sakaria moshitukulwa shaShana okwa hovela oilonga momudo 2021, nokonima okwa hoololwa ku Kakakutu Komatanga General Joseph Shikongo, a ninge omukulunhu wopolifi moshitukulwa. 

Sakaria nghee a waimine mOshana, ina fiya emanya la londa kulikwao. Oilonga yaye okwa li hai li monikila. 

Oimbiluma okudja ashike komadipao, omakwatonghonga, oulunga moinina yayooloka nai kwao ya wedwapo okwa li ya konekwa tai shuna pedu. 

Ngoloneya mukulu woshitukulwa shaShana Elia Irimari okwa ti moule weedula da fika punhano edi a longa naSakaria, okwa didilika oinima ihapu iwa noishi oku hopaenenwa mouleli waye. 

“Onghundana ei onda kala ndei teelela shaashi Sakaria omuleli umwe ou ena ounongo muhapu noshitukulwa shaShana okwa li shishona kuye,” ta ti. 

“Ondodo youleli oyo a pewa oyaye mwene, yemuwapalela noyemufewa shaashi oha longo noudiinini, Irimari ta tumbula. 

Irimari okwa ti Sakaria okwa eta Oshana pondodo inai monika nale, novalongela kumwe naye meepololeyeka dihapu nodakula ngaashi, oku eta oufano voku tala nokukeelela oimbuluma moshitukulwa. 

“Oilonga ya Sakaria ihai popiwa ashike mokonya ohai etwa poshitaafula, noku tulwa moilonga moule wefimbo lixupi lela,” ta ti. 

Iramari okwa yelifa yoo kutya keembonge dipe oku kwaya Lungameni okuna oku li monikila kutya okwa ye epanda, nelunduluko ota li keli monikila. 

Omanga Mayola mukulu wodoolopa ya Ndangwa Paavo Amwele ta ti Sakaria omuleli umwe ou ha ningile ovanhu aveshe efimbo. 

“Mouleli waye oha kala alushe afya oshisho okupwilikina komakemo ovanhu aveshe, ndele ngeenge shipanga ota nyenge nangolo, oha tumu eemwiya dashinana di kale da kandulapo oupyakadi meendelelo,” ta ti. 

Frieda Jeremia omukalimo waShakati okwa ti yee okwa li ehole ouleli wa Sakaria shaashi okwa kala hamono omhito yoku vaningila oyoongalele, ye teva tu omukumo. 

Ovakalimo moshitukulwa ova halela Sakaria aka longe nawa, yee atwikile noku kala ena oshiwana komutima oshoyo komwenyo. 

Sakaria haye ashike apewa etemo lipe, ndele opolifi oya yandja yoo eemihito deendodo dopombada koitukulwa yayooloka. 

Ngaashi Commisioner Julia Sakua-Neo okwa pewa opoosa okale omukulunhu wopolifi koshitukulwa sha Zambezi, Andreas Nelumbu oo kwa li omukulunhu woshikondo sheameno lokombelewa yomupresidente woshilongo ,okwa kaninga omukulunhu wopolifi koshitukulwa shaKavango-East. Omanga Andreas Shipingana Shilelo oo ali omukulunhu wopolifi koZambezi taka ninga omukulunhu wopolifi koshitukulwa shaShana. 

-taimihaihambo2000@gmail.com