ONGWEDIVA- Ohamba yOvakwanyama Martha Kristian Mwadinomho Nelumbu oya lekelwa moshipangelo konima eshi kwa li ya tambulilwa moshipangelo shopaumwene shoMedi Park. Omunashipundi welelo laUkwanyama Eliasa Waandja okwa koleka ta ti Ohamba oi li keumbo paife noi li monghalo iwa. 

Okwa ti Ohamba Martha okwa li ya mona oshiponga ya teka mokuulu konima eshi ye lidenga po monduda yaye yokunangala. 

“Ohamba oya twalwa koshipangelo meendelelo opo i ka mone epango lopaunamiti,” Waandja ta ti. Waandja okwa pandula ovanailonga vouhaku koshipangelo shaMedi Park eshi va kala nokuyandja omayakulo ouhaku kOhamba,” ta ti. 

Okwa weda po ta ti oshiwana nashi xulife okupopya omahokololo oipupulu kutya Ohamba oi li monghalo idjuu. Okwa kumaida oshiwana opo shi twikile okukala shi na ombili noshoyo okulongela kumwe okulwifa oimbuluma. 

Mexuliloshivike Omupresidente Nangolo Mbumba noshoyo omupedupresidente Netumbo Nandi-Ndaitwah okwa li va talela po Ohamba Martha kouhamba konima eshi ya lekelwa moshipangelo. 

Ohamba Martha okwa li ya hafa unene okumona omuleli woshilongo noshoyo omupedupresidente Nandi-Ndaitwah molwokutalela po kwaye kOhamba.- fhamalwa@nepc.com.na