Umwe waimba mba kondjera ongutukiro yehi ndi okuzira moukoto wehi tjinene okuzira koruvanda mba pirura omatjindisiro wovandu kOkatutura mOtjomuise, mai sakewa ekutu muhuka omunene mOtjomuise mombongo ya Katutura.

Eye tjinene ma tjiukirwa kozohoroose zondjembo yoruvanda yo 1959 novakwao, muwo mu mwari oo Sam Nujoma, Fritz /Aowaeb Gariseb, Jeremias Jagger, Gerson Hitjevi Veii, Johannes Skrywer , Moses Garoeb, John Ngavi (Garvey) Muundjua, Uatja Kaukueatu, Alfred Haro, Gawanab. 

Mba kara norupa ohongora norunene mokupirura omaungurisiro wetuwo rwomavinu, rwomapundiro, nozombesi zonongomainde. Omapanḓero woviṋa mbi avihe mu mbari norupa rokupanḓa okutjindisirwa kOkatutura. 

Conradie ngu ma tjiukwa otjomundu ngwari nonḓikameno ngwa ha ivaiva, mokupingahasana ku noporise na wina orupa rwovita rwa South Afrika yotjivara tjombangu oruveze ndo, mongondjero yohoromende indji okutjindisira ovandu kOkatutura, we ripatera mondjuwo ye kutja ouhopare imbo tji mau vanga ngau haṋe ondjuwo ngunda ae ri mo u mu haṋene pu nondjuwo ye. 

Tji tjari otjiṋa tji tja sekamisa onyungunyungu onene. Tjandje eye we ripatere mondjuwo ye ama panḓa okupita. 

A kapita uriri indi ina Maline! Owoses-Conradie nu kombunda omuramwe Miṱiri Herbert Conradie, na wina hongaze Elsie Conradie, tji va isanewa nave riyarikaṋa kuye tjandje veri moruhoze orunene mave munu kutja omuatje wawo wa haṋenwa pu nondjuwo ye nu tjapo a ṱiririre. 

Omuyaruke Veii tja kamburirwe Conradie wa uta okuwonga otjimariva tjaatja ma randa natjo etemba rokuworonganisa naro otjiwaṋa nu tjandje nangwari otjokukasutira Veii ohahende. 

Eye kutja otja weza kotjimariva tje omuini okuza mondjaṱu ye omuini. Eye na Fillemon Gawanab ombari ovandu tjiva mbari ovasenina okutjinda moruvanda okutjindira kOkatutura momaturiro ndino ndi nge tjiukwa otjOndorama. 

Ngunda tjiva tjimuna oo Ngavi (Garvey) Muundjua/ ave hi na va tjindire okuza koruvanda okuyekutura mOkatutura kaparukaze. Nungwari monyengo yawo ya Katutura ave rire ovataurire vokozoresevate tjimuna kOmongua tji kweya ku Muundjua. 

Conradie wa kwaterwa mOruvanda mo 1937, Po Ao llAexas. Wari okaṋepo kOmbongarero yOtjiwaṋa ondenga okuza mo 1992 ngandu mo 1996 nu mo 1994 arire Operesindenda onḓize yotjira tje oruveze ndo Ofederal Convention ya Namibia (FCN). Wa ṱa mo 2014.