Taimi Haihambo

Mexuliloshivike omwa lopotwa oibofa ya yooloka yomahepeko omomaumbo omo mwa kwatelwa ovakainhu nounona ngaashi oku li monifa oiponga komalutu, nexwike po leumbo.

Omulumenhu weedula 27 koshitukulwa shaHardap, okwa lopotwa a tulwa kopolifi moipandeko, konima eshi a xwika po eumbo laina.

Omupopiliko wopolifi omupedu Commissioner Kauna Shikwambi okwa koleka oiningwanima ei. 

 Opolifi oya hokolola tai ti eumbo ola pyapo filufilu, nomwa xupa ashike oinima ishona yomokombifa, ashike ka pena ou a monenamo oshiponga.

Moshiningwanima shafaafana vati omulumenhu weedula 24 natango koshitukulwa shaHardap, okwa tulwa moipandeko konima eshi a denga kahewa kaye kopaihole weedula 28.

 Omufekelwa vati okwa denga kahewa kaye kopaihole needalate osho yo neengonyo, nokumonifa eisho laye lokolulyo oshiponga.

Omukainhu wokoshitukulwa shaKhomas naye okwa patulula oshibofa shina sha no mahepeko oo meme nounona, konima eshi vati a dengwa komulumenhu naye neepaipi komutwe  osho yo nomanghava fiyo ta ningi oipute.

Oshiningwanimwa shikwao, omukainhu weedula 38 woko Rehoboth naye okwa monifwa oshiponga komulumenhu waye konima eshi e mu ponokela needibo, ndele te mu denge.

Opolifi oye pyakidila nokukonga omufekelwa ou shaashi okwa faduka po.

Olopota yopolifi oya yelifa kutya moibofa aishe ya tumbulwa ovanhu ashike vavali vatulwa moipandeko.

 Omakonakono opolifi otaa twikile komesho.

Opolifi oya kumaida oshiwana opo shi longelo kumwe okukondjifa omahepeko omomaumbo nokulopotela opolifi pefimbo.

taimihaihambo2000@gmail.com