Oilonga yopate ei tai tungwa pokati kOndobe nEenhana moshitukulwa shaHangwena, oi li metifa noya teelelika yi kale ya pwa mo2028.

Opate ei oya tamekelwe okulongwa, kehangano loUnik Construction, ehangano olo la vena po otendela tayi tengenekelwa pongushu yeemiliona N$365. 

Ehangano eli ola li la ulikwa kexulilo lomudo 2025, okudilila koRoads Authority, opo li dule okumanifa opate ei ya ninga eedula tai tungwa ndele shidjuu okwa li ta nyenge ava va li va ulikwa va tunge. She likwatelela komauyelele okudilila kehangano loRoads Authority, opate ei oya longwa oule weekilometa 30, ashike natango ovalongi vopate ei ove lipyakidila vali nokuweda ko oinima ngaashi oupapa vokuyandja omaluvala oufiku, osho yo okufitika omalambo. Oilonga yopate ei oi li koshi yewiliko loElement Consulting Engineers noya teelelika i ka yandje oilonga kovanhu ve li 80. Omupopiliko wehangano loRoads Authority Hileni Fillemon okwa ti opate oya kala ya pata oule weedula dihapu, molwashi ehangano olo la li la nuninwa oshinakuwanifa eshi ola dopa okuwanifa po oilonga oyo. 

Opate ei oya li ya ninga oshihakanwa shomalambo, yo oya li ya kulupa neenghono, nonande oyo imwe yomeepate dakula moshitukulwa, hai longifwa efiku nefiku. 

Fillemon okwa ti ovashingi voihauto ova kala nokunyenyeta nghee opate ya kala tai nyono oihauto yavo, yo otai eta oiponga yombaadilila molwonghalo omo ya kala. 

“Nonande kwa kala ku na omahangano ahapu haa kwata eetendela dokulonga opate ei, natango dihapu oda li da xulila mounyengwi,” Fillemon ta ti. Ta twikile ko yoo kutya, “vamwe nokuli ova fiya ashike opate i yadi omalambo, osho yo ondwi ihapu, nonghalo ei oya kala tai dana onghandangala efimbo noule, noya kala tai piyaaneke lela shihapu.” 

Mopaife ovashingi otava longifa lela opate va manguluka. Nonande eemhango dopate ode di kutya nava shinge noukeka, vo tava landula eemhango dopate opo ashike va dule okuxupifa eemwenyo.

-taimihaihambo2000@gmail.com