Auleria Wakudumo
Okaana keedula 10 otaka fekelwa ka dipaa kakwao keedula mbali, ka longifa oshilongifo shihe shivike.
Oshiningwanima osha ningilwa komukunda Akaonde mOnesi moshitukulwa shaMusati, sha ningwa Olomakaya lwopo 20h00.
Edi oda kolekwa kukomufala wopolifi moshitukulwa shaMusati Ismael Basson.
Basson okwa holola ta ti vati omufekelwa okwa fiwa meumbo navakwao vatatu (vavali veedula mbali nakamwe keedula heyali) kovadali manga va ya koukamba okudja po16h00.
Eshi vati ovadali va aluka lwopo 20h00, ova hanga mo ashike ounona vavali meumbo.
“Eshi va pula apa vakwao ve li, aka ka kula oka holola kutya omufekelwa okwa tula nakuningwa oshihakanwa omadu mokanya naashi vati a mona ita fuda vali okwa tula olutu laye mondoloma, ta nanene ondoloma moixwa nokuumbilamo olutu laye kombada yoiti,” Basson ta ti.
Basson okwa weda po yo ta ti omufekelwa vati okwa ka hondama mepya konima yokweekelashi olutu.
Omufekelwa vati oku na oudu wombada (kokaoko nokaulu kokolulyo) ashike ke na ondjokonona youdu wopamadiladilo.
Opolifi oya holola kutya omufekelwa ina tulwa moipandeko, nove na okulongifa omuxungimwenyo moshiningwanima eshi.