Auleria Wakudumo
Omudali womunafikola e li mOndodo 11 ko-I.K. Tjimuhiva Boarding Combined School, okwa holola eudonai molwokamonamati oko ka tewa momuhandjo ashike ovahongi inava popya novadali kombinga yetokolo lavo.
Martin Shikongo wokOlukulo mUukwaluudhi okwa ti mo2023 ovahongi ova kufile omona peumbo sha dja eshi va mona ta dana nawa etanga kekopi laNgoloneya waMusati mOutapi. Ta ti okwa li va udaneka ve mu shune mofikola ashike paife eshi a nyona eemhango dofikola inava shivifila ovakulunhu, ove mu taataa mo ashike.
Shikongo okwa ti okwa uda ashike kutya omonamati okwa hangwa nongodi momuhandjo.
Shikongo okwa ti vati eudafano lovahongi ola li okufuta ofikola neemhumbwe daye adishe mwa kwatelwa omuhandjo opo a kale ta dana etanga pofikola opo.
“Onda uda nai unene shaashi ove mu taataa oufiku.
Ova udaneka okufuta eemhumbwe daye adishe opo a kale ta danene ofikola.
Omumwange nande ka li mofikola okwali ta lundulula oilongwa yaye koNamcol manga e li peumbo inava shiivifilange nokuli ashike paife ohandi likufa oshimaliwa ndihe shi na okufutila omunhu ta di kondje yomuhandjo,” Shikongo ta ti.
Shikongo okuudite eshi sha ningilwa omona vati shihe li pamulandu shaashi vati ofikola inai mu shivifila omikalo dokaana ile ekufemo laye momuhandjo.
“Onda kendabala okuninga ekwatafano nofikola opo a pewe ouyelele wa wedwa po ashike vati okwa nyamukulwa kutya okaana naka kale ashike kondje yomuhandjo,” Shikongo ta ti.
Shikongo okwa ti okudja komukunda wavo wa uka kofikola ope na eekilometa 120 noha pa futwa N$220 okuya nokwaaluka onghene okaana itaka dulu okudja keumbo keshe efiku. Shikongo okwa holola ta ti omona okwa uka mondodo 11 paife ashike natango ita shuna momuhandjo.
Omukulunhufikola Linus Phillipus okwa koleka kutya okaana oka kwatwa nongodi momuhandjo, oyo vati kwa li hai litambekidwa momuhandjo woukadona novamati.
Phillipus okwa holola ta ti ofikola ihai taataa vati ovahongwa, ohava pewa ashike ehandukilo va kale keumbo oule wefimbo oo ta ti inau fika nokomwedi.
“Otwe mu ifana e uye kombelewa opo a pewe ombaapila a twale kovakulunhu lwopo 19h00 ashike okwa anya okuuya kombelewa nokwe tu lombwela kutya ota ka tala ashike oinima yaye a shune keumbo, Phillipus ta ti.
Omukulunhufikola okwa weda po yo ta ti ofikola inai ninga ekwatafano novadali, yoo inai ninga omakwafo a wedwa po novadali vati inava ninga onghendabala okufika kofikola.