Omalongo gekwatonawa lyombongo nehungomwenyo mopolisi 

Omalongo gekwatonawa lyombongo nehungomwenyo mopolisi 

ONDANGWA- Kakukutu komatanga gopolisi Joseph Shikongo okwa popi kutya otaya ka tameka noprogalama ndjoka tayi ka longa aapolisi nkene ye na okukwata oshimaliwa nonkene ye na okuhunga oomwenyo osho wo okukondolola nokukandula po omaudhigu ya taalela. 

Shikongo okwa popi ngaaka pethimbo a li ta popitha aapolisi ye li komadheulo koRuben Danger Ashipala kOndangwa mOmandaaha. 

Ta fatulula kutya otaye ya po nooprogalama ndhoka konima ya ndhindhilike kutya aapolisi yamwe otaya yi kiilonga ye na omaupyakandhi komitima. 

“Shika otashi ka yambidhidha aapolisi ya gwanithe po iilonga yawo nawa osho wo okukwata nawa iimaliwa yawo,’’ ta fatulula ngaaka. Kakukutu komatanga esiku ndyoka okwa kumagidha aapolisi taya dheulwa ya longithe nawa iimaliwa, ya kwathele aavali yawo yo kaaya kuthe oondjo uuna ya tameke okulonga. Aalumentu naakiintu mboka ya pewa okafudho komasiku opo ya ka tameke iilonga yokwiidheula, oya li ya pewa omakumagidho ga pama esiku ndyoka. 

Shikongo esiku ndyoka okwa kumagidha aapolisi taya dheulwa opo ya ka tunge omagumbo gawo komagumbo, ya tameke okutunga omanga aashona. 

“Ihashi pula okukwata oshimaliwa oshindji opo gumwe a tunge, ihe aantu ayehe ohaya tameke nokashona,” ta popi ngaaka. 

Ta ti, ino tegelela wu thike poomvula 40 opo wu tunge, ta ti ito ka gwanitha. 

Shikongo okwa kumagidha wo ta ti, naya ka kwathele aakuluntu yawo uuna ya tameke okulonga. “Ngele mwa tameke okulonga, kwateni oshimaliwa sheni nawa, hakulanda oongodhi dhooI-Phone 16, nokuza koohiila dhondilo,” ta kumagidha ngaaka. 

Landeni shoka tamu vulu okulanda naashoka sha pumbiwa, ihe hakulanda shaashoka oshoka oshi li kukuume koye. 

Shikongo okwa kumagidha wo ya kale kokule nokukutha omikuli ngaashi. 

“Omikuli ohadhi teya po aantu, kadhi li nawa. Onda mono natango omahangano gokushanga gokukwashilipaeka ga yooloka taga ningi omayindilo anuwa ge ye ga popye nane sho tamu mana okudheulwa, shoka otashi ti ngiini?” ta pula ngaaka. 

Okwa lombwele aapolisi mboka ta ti, naya kuthe ko iilonga yawo yi itula mo, naya ka gandje omayakulo moshigwana ngaashi shi na okuningwa, omikalo osho wo elongelokumwe inali ya kala kokule. 

“Kaleni aapolisi ye na elandulathano, ye na omikalalo yo taya gwanitha po iilonga yawo,” ta kumagidha ngaaka. 

Aapolisi mboka taya dheulwa oya li ya tameke omumvo gwa yi muAguste noya tegelelwa okumana nuumvo kehulilo lyaMai. 

KoRuben Danger Ashipala oku na aapolisi taya dheulwa ye li 908 ya za kiitopolwa ayihe 14. 

Omadheulo ga faathana otaga ningwa ngaashi koPius Joseph Kaundu kOmaheke osho wo koSimon Mutumba Mutumba koZambezi. 

Omadheulo agehe kumwe oge na aapolisi taya dheulwa ye li 1 800. 

Omudheulwa gumwe okwa li uulike enyanyu sho ta ka mona aakuluntu ye konima a ningi oomwedhi ne kaaye li mekwatathano nayo. -vkaapanda@nepc.com.na