Ounona moshitukulwa shaShikoto onghee natango tava twikile nokuninga oihakanwa yomahepeko opaixulo.
Moshiningwanima shaxuuninwa omo mo okaana keedula nanho ka kwatwa onghonga efimbo lokomatango mEtine momafiku 03 Febuluali momukunda Omena mOshikoto.
Edi oda kokulekwa komupopiliko wopolifi moshitukulwa shaShikoto Inspector Ellen Nehale. Nehale ta ti okaana oka hangika taka danauka nokamwainamati mekove lambulavo komufekelwa oo a li ta lifa.
Omufekelwa vati okwa tameka okuheka okaana opo vaye va ka life nako. Eshi va ya moixwa okwa tameka okudula okaana oikutu ndele te ka longele oilonga youshada.
Opolifi oya ti okaana oke ya okulopotela mumwainamati weedula 11 oo a ka lombwela inakulu meumbo.
Nakuninga oshihakanwa okwa twalwa koshipangelo ShaNandjokwe opo a ka ningilwe omakonakono opaunamiti.
Omukufekelwa oku na eedula 15, okwa kwatwa po Etitano nota ka holoka momhangu Omaandaxa.
Omakonaakono opolifi otaa twikile.
Inspector Nehale okwa ti Oshitukulwa shaShikoto osho shimwe sha didilikwa shi na ounona vanini tava ningi oihakanwa yokukwatwa keenghono unene tuu ounona ava ve li metonatelo lovakulupe.
Okwa ti ounona hava kala novakulupe ove li meshongo linene ngeenge va kwatwa onghonga eshi oibofa yavo hai lopotwa kwa laata unene shaashi fimbo limwe omukulupe iha dulu okufika diva kopolifi.
Okwa weda po ta ti oitaasi yopolifi imwe oi li kokule noshiwana shaashi ovanhu vamwe ohava di komikunda dokokule onghee naashi ohashi eta opo oibofa i kale ya lopotwa kwa laata.
Nehale okwa kunghilila oshiwana opo shi kale tashi lopotele opolifi pefimbo ile oovene vomikunda opo va dule okukala va shivifila opolifi, ile ovanhu ngeenge kave na eengodi dopeka nava kale tava lombwele ovashiinda shavo opo va dule okukwatafana nopolifi diva.
“Ohashi kala shipu ngeenge opolifi ya lopotelwa pefimbo opo ku kale kwa ningwa omakonakono diva,” Nehale ta ti.
fhamalwa@nepc.com.na