Paulina Ndalikokule 

Okanona komvula yimwe anuwa okahulitha sho ka gwile meyemele lyomeya molukanda Omonawatjihozu kOshifo moshikandjohogololo Ruacana.

Omulukuntu gopolisi moshitopolwa shaMusati Ismael Basson okwa koloke oshiningwanima shoka ta ti osha ningwa mEtitatu pethimbo lyomutenya.

Basson okwa ti nakusa anuwa okwa li nayina nayinagona pegumbo pethimbo lyoshiningwanima shoka.

“Otaku hokololwa kutya nakusa okwa shuna megumbo ina monika, konima olutu lwe olwa ka adhika kuyinagona meyemele lyomeya,”  Basson ta ti.

Nakusa okwa okwa tongololwa onga Elao Hauvi, naapambele oya tseyithilwa nale.

Moshiningwanima shaa yooloka opolisi mOmusati mEtitano oya kwata po omulumentu (29) omukwashigwana gwAngola ngoka ta fekelwa ekwato koonkondo lyokanonakadhona koomvula 15 megumbo moka anuwa ha longele.

Basson okwa koleke oshiningwanima shika, ta ti kutya nakuninga omuyonena nguka okwa yi anuwa mondunda yokakadhona hoka te ka hula, noku ka ningila anuwa omatilitho kaaka ninge omakudhilo gasha manga tayi nako miihulo.

Otaku hokololwa kutya oshiningwanima shika osha ningilwe mOlyomakaya potundi ontimugoyi yokongulohi megumbo momukunda Ombwana B, moshikandjohololo Okalongo.

Omulumentu nguka oku li momake gopolisi a taalela oshipotha shekwato koonkondo, nota holoka mompangu yamangestrata gwOutapi nena.

Omakonakono gopolisi moshiningwanima shika otaga tsikile.

-ndalikokulep@gmail.com