Okapangelo kaTsintsabis moshitukulwa shaShikoto oko ka kala ke na ekuma la tenda noipeleki tai hale okuwako oka longululwa nokuetwa pomufika u li nawa.
Edi oda kolekwa komukulunhuwiliki wouhaku moshitukulwa shaShikoto Joshua Nghipangelwa.
“Kokapangelo otaku longele ovapangi vatatu tava yakula nawa ovanaudu nondjungu. Fiyo opapa inatu didilika oupyakadi wa lopotwa kokapangelo shaashi aishe oi li peenhele,” ta ti.
Okwa ti ombelewa yaye otai twikile okuyandjaneka omayakulo opaunamiti koshiwana molwaashi osha fimana ngeenge oshiwana shi li popepi noupangelo osho yo noipangelo yakula.
Nghipangelwa okwa ti moshitukulwa shaShikoto omu na oupangelo 22, omandiki ouhaku atatu noipangelo yakula itatu mwa kwatelwa oshipangelo shaNandjokwe osho shi li shakula moshitukulwa.
Okwa yelifa ta ti ombelewa yaye otai shi endifa nawa ngeenge tashi ya pokuyandjaneka omayakulo opaunamiti shaashi oshiwana shi li momikunda ohashi pewa ehongo kombinga yomikifi da yooloka.
“Ovanailonga vouhaku ohava i momikunda ndele tava pombele momaumbo opo ku kelelwe omukifi womalaria,” ta ti.
Nghipangelwa okwa ti okapangelo oka wedelwa neenduda dokukala ovanaudu molwaashi kakwa li pe na eenduda da wana.
“Natango otwa longulula eumbo lokunangala ovapangi molwaashi okwa li la kulupa tali hale okuwapo,” ta ti.
Okwa ti okapangelo oko ohaka yandje omayakulo ouhaku kovanhu tava di komikunda da yooloka mwa kwatelwa ovanafaalama.
“Oshikandjohoololo shaGuinas osho shimwe shi hadi ovanafaalama naashi osha eta opo okapangelo ka yakule ovanhu vahapu tava di meefaalama,” ta ti.
Okwa kumaida ovapangi opo va twikile okuyakula nawa oshiwana nosho yo ovanaudu va kale va na elongelokumwe.
-fhamalwa@nepc.com.na