Okashelu ka dipaa umwe, vatatu va xupa

Okashelu ka dipaa umwe, vatatu va xupa

Auleria Wakudumo 

Omukainhu weedula 28 okwa xulifa eshi onduda omo va li va nangala ya kwatwa koluvadi. 

Oshiningwanima osha ningilwa komukunda Nkonke moshitukulwa shaKavango West keengulasha dEtine, lwopo 04h00. 

Nakufya okwa tongololwa oye Johanna Nzawo, omukalimo wokomukunda Matata mOkavango West.  

Oshiningwanima osha kolekwa kukomufala wopolifi moshitukulwa shaKavango West, Commissioner Julia Sakuwa-Neo.

Sakuwa-Neo okwa holola ta ti nakufya okwa li a nangala monduda imwe novakainhu vatatu eshi okashelu ka shelula po onduda noya tameka okupya.  

“Shaashi Nzawo okwa li a xulifa nale koluvadi, olutu laye ola pya shinyanyalifi,” Sakuwa ta ti.

Vakwao vatatu vati ova pondola okunhuka mo monduda nokufadu ka po ashike umwe okwa pya kombuda. 

Oshiningwanima shikwao, omulumenhu weedula 27 okwa holoka momhangu yaNdangwa onghela molwaashi a xwika po obashu yamumwaina filufilu. 

Oshiningwanima osha ningwa Olomakaya lwopo20h00 koAkoonde No. 2 moshitukulwa shaShikoto. 

Komufala wopolifi mOshikoto, Commissioner Teopolina Kalompo-Nashikaku okwa koleka oshiningwanima eshi. 

Omufekelwa vati okwa li ta tuku ovanhu poukamba eshi mumwainamati e mu lombwela a xulife po okutuka ovanhu.

“Okudja opo okwa fufaeka nokulombwela mukwao kutya ote mu longo oshilongwa ita dimbwa monghalamwenyo yaye,” Nashikaku ta ti. 

Nashikaku okwa holola ta ti omufekelwa okwa ya keumbo ndele ta kufa mo oinima yaye aishe, ta kufa oshikuni pomafiya e li pondje ndele ta tomeke obashu omundilo. 

Pefimbo loshiningwanima vati mobashu omwa li ovanhu ashike inava ninga po sha. 

Mobashu omwa pila oinima aishe yamumwaina i na ongushu yoshimaliwa shi fike N$15 000.  

 -wakudumoauleria@gmail.com