Omupopiliko wokakomisi komahoololo, Electoral Commission of Namibia (ECN), De Wet Siluka okwa ti aishe oya pwa okulongekida okuninga omahoololo oukansela koshikandjohoololo shaGuinas nena.
Okwa ti ovanambelewa vo-ECN ova pewa omadeulo opo va dule okuyakula nawa oshiwana pefimbo tashi ka hoolola. Omahoololo otaa ningwa sha landula efyo lakansela ou kwa li ta wilike oshikandjohoololo shaGuinas, Elias Barney Martinus.
Martinus okwa xulifa mepupi lomido 51, omudo wa dja ko koshipangelo shaTsumeb. Okwa li a hoololwa a ninge kansela omudo 2020. Siluka okwa ti eengudu ashike mbali tadi ka kufa ombinga momahoololo koGuinas. Moses Khumub ota ka kalela po ongudu yoSwapo omanga Fransiskus Khumub ota ka kalela po ongudu yo-LPM.
Ovalumenhu ava tava kufa ombinga momahoololo ova pambafana. Siluka okwa ti ECN okwa li a pula eengudu dopapolitika opo di yandje omadina ovanhu vavo ovo tava ka kufa ombinga momahoololo.
Kakukutu kopolifi Inspector General Joseph Shikongo okwa ti ombelewa yaye otai ka tuma ovapolifi 18 koshikandjohoololo shaGuinas nelalakano lokutula po eameno nelandulafano koukefa vokuhoololela.
Shikongo okwa kumaida ovapolifi opo va longe nouyuuki nosho yo okutula po elandulafano ngaashi naana kwa li va ninga omudo wa dja ko pefimbo lomahoololo Oupresidente noilyo yomutumba wopashiwana.
“Kape na omunhu ta i kokakefa kokuhoololela a djala omidjalo deengudu dopapolitika. Oshiwana nashi liufe komilandu da tulwa po kopolifi,” ta ti.
Oshikandjohoololo shaGuinas otaku kala oukefa vokuhoololela ve li 20.
Ovanhu 4 337 ove lishangifa oukalata vomahololo moGuinas.