ONDANGWA – Omagadhi goongongo otaga dhana onkandangala kondje yoshilongo okulongithwa miikulya nokugwaya, shoka sha lundulula oonkalamwenyo dhoomeme yamwe kuushayi, hoka taga ndulukwa.

Omagadhi goongongo ohaga zi moongongo hadhi zi komuti gomugongo, hadhi gongelwa eta dhi kolwa, ta dhi eta po wo iikunwa. 

Ohadhi kukutikwa eta dhi katendwa dhi ze omahuku ngoka haga eta po omagadhi.

Omagadhi ngoka oga kala ga tali ka ko ashike goshiwimbo no haga kala ashike haga longithwa ashike kuushayi, ihe nena otaga dhana onkandangala kondje yoshilongo onga omagadhi gokugwaya osho wo gokulya.

Omagadhi ngoka ohaga ndulikwa kehangano tali ithanwa Eudafano Women Marula Manufacturing mOndangwa.

Omukuluntuwiliki gwehangano lyoEWMM, Martha Negumbo okwa ti ohaya ndulike omagadhi ngoka oku za komahuku tayega ningi omagadhi.

“Omahuku ohatu ga landa oku za momikunda okupitila mongundu ndjoka ya totwa po, hayi tu e tele,” ta fatulula ngaaka.

Negumbo kwa ti, uuna omagadhi ga pu okundulikwa ohatu ga tu mu kiilongo yokondje, osho wo mondoolopa dhilwe moshilongo.

Ta ti, omagadhi ngoka oge holike noonkondo omolwa ongushu yago no haga pulwa noonkondo uuna ga pu po.

“Okupitila moproyeka ndyika, okwa lundulula oonkalamwenyo dhomeme yamwe omolwa shoka haya mono po okukayambidhidha aakwanezimo yawo,” ta popi ngaaka.

Gumwe gomaakiintu mboka haya landitha omahuku kehangano lyoEWMM Sylvia Uugwanga, okwa ti onkundana kutya omagadhi ohaga ndulikwa mOndangwa taga ka lathithwa kiilongo yokondje ohayi mu uvitha nawa.

“Nani ota tu longo iilonga inene, okuuva kutya shoka ta tu longo mpaka ohashi kalandithwa kondje yoshilongo otashi tu petha oombandi,” ta popi ngaaka.

Ta ti, ka kwali yeshi kutya omahuku otaga vulu okueta po oompito dhiilonga ngaashi ngaaka. 

Selma Taapopi, okwa ti oproyeka ndyoka oheya yambidhidha okuhwepopaleka onkalo yawo, oshoka ka kwali haya mono iiyemo ya sha.

“Nena oha tu vulu okuikwatha se yene oshoka ohatu mono iiyemo okupitila moproyeka ndjika,” ta popi ngaaka.

Aakiintu mboka oya kala ya taalela uupyakadhi wokueta po omahuku sho ya kala noku longitha ekuwa okutenda oongongo.

Ya ti, momagumbo omakuwa ohaga longo iilonga oyindji onkene okueta po omahuku okwa kala shanamundonda oshoka ethimbo limwe ekuwa ota li longithwa iilonga yilwe.

Ashike, iilonga yawo oya ningwa iipu sho ehangano lyoRossing Foundation lya yambidhidha ehangano lyo EWMM nuushina 200 wokutenda oongongo, opo iilonga yawo yi kale iipu no tayi endelele.

Omupopiliko gwehangano lyoRossing Foundation Laina Hakweenda okwa ti oya yambidhidha ngaaka opo ya hwepopaleke iilonga yaakiintu mboka.

Omukiintu gumwe naye ha landitha omahuku kehangano lyoEWMM, Maria Shilongo, okwa ti uushina mboka otau keya kwathela noonkondo oshoka otaya ka longo taya endelele.

“Okulongitha ekuwa ohaku ende kashona ko natango oto vulu okuindanda koonyala,” ta popi ngaaka.

vkaapanda@nepc.com.na