Oofoloma dhomaindilo goTotem kOshakati dha piti mo

Oofoloma dhomaindilo goTotem kOshakati dha piti mo

Elelo lyondoolopa lyaShakati otali hiya oshigwana shi ningi omayindilo gomahala komauliko giipindi nuumvo. Omugandji gomauyelele melelo lyondoolopa lyOshakati Katarina Kamari okwa ti oofooloma odha pita mo na kehe gumwe okwa manguluka okuninga omayindilo.

“Omauliko gomazimo ga shuwika nawa Totem nuumvo otagaka tameka momasiku 30 Mei sigo gaheyali gaJuni. Otaga ka ningilwa mokapale kemanguluko kOshakati moka haga ningilwa shito” ta ti ngaaka.

Kamari okwa ti ofolooloma otayi pula ashike N$150, naangoka taka pita mo otaka futa oondando dhi ili sha ikwatelela ko katala hoka ta kutha.

Okwa fatulula kutya okatala kiilandithomwa iishona mwakwatelwa iikuya niikunwa okena N$1 500, kiikulya yoshiwambo N$500 okapana N$1 500 komahangano nooministeli dha yooloka N$5 000 omanga mboka tau ka kala kondje yokapale N$750. 

Kamari okwa popi kutya omauliko gomazimo niikwaipindi gaShakati ngoka hagi ithanwa Totem haga kala ko omumvo kehe, oga tamekele okuza momumvo 2012.

“Omaulikilo ngaka otaga ka gandja ompito ombwaanawa kaanangeshefa ashona okushingitha osho wo egandjo lyomauyelele komauministeli gi ili nogi ili nosho wo kiikondo yepangelo naambyoka yaashi yepangelo,” kta ti ngaaka.

Momaulikilo ngoka ota mu ka kala omathigathanopo ogendji.

Ta ti, ota mu ka kala aaimbi kamana nosho wo ethigathanopo lyokakadhona ndhingi kaTotem. 

Kamari ota ti kehe ngoka ku shi nawa ezimo lyoye nenge ku shi sho hali itanga, onawa wu ye komaulikilo ngaka, wu pulakene nkene hali tangwa nosho wo oku uva nawa ondjokonona yalyo.

Ngele to yi mo meni ohaku futwa ooN$20 kaakuluntu nooN$10 komunona. Ohauto nayo otayi futilwa ooN$10.

vkaapanda@nepc.com.na