ONGWEDIVA – Omukulunhu wopolifi moshitukulwa shaShana Commissioner Naftal Sakaria okwa ti osha fimana ngeenge ovapolifi tava pewa omadeulo kombinga yonghalonawa yopanghalafano opo va kale ve na ekwatafano liwa koilonga noshoyo noshiwana.
Edi okwe di popya onghela pefimbo ta patulula omadeulo ovanambelewa vopolifi a ningwa koshiputudilo shaUnam mOngwediva.
Ovapolifi 50 va dja koitaashi ya yooloka ova kufa ombinga momadeulo e na sha nongholonawa yopanghalafano. Omadeulo oludi eli otaa ningwa koitukulwa ya yooloka nelalakano lokuyandje ouyelele nehongo kovapolifi.
Pefimbo lomadeulo ovapolifi otava ka ninga oinyangadalwa ya yooloka tai yandje ehongo nghene omupolifi e na okulonga noshiwana ile novapolifi vakwao.
Sakaria okwa ti omadeulo otaa kelele onghalo yoshinyenu koilonga unene tuu okukelela ovapolifi tava hepekwa koudu wopamadilaadilo.
“Omadeulo onghalonawa yopanghalafano otaa kaleke po oundjolowele wovapolifi nokukaleka po omudingonoko muwa woilonga,” ta ti. Onghee okwa ti osha fimana opo ovapolifi va kufa ombinga momadeulo opo va ka topolalefane ouyelele novapolifi vakwao ovo inava mona omhito yokuya komadeulo.
“Omadeulo aa otaa kaleke po ombili keenhele doilonga, otaa eta omupolifi a longe nondjungu noshoyo a kale e na ombili yokomwenyo,” ta ti.
-fhamalwa@nepc.com.na