Omuhaamise wOvihavero vyOtjirata tjOrukondwa rwa Maheke, Ignatius Kariseba, ma tja ongono momatungiro wozondjuwo na wina omaparwisiro momayandjero wehi ya isa ovengi morukondwa nokuhina otuveze pu mave hara omaha omasemba.   

Kariseba wa patururire ombongarero ondenga yotjirata ombura ndji Omandaha mEpako. Ama tja ovature ovengi va tura mozondjuwo nḓe he ri ozombwe nu nḓe he ri mongaro ombwe nandarire mozongondjero nḓe kayendisiwa. 

Omaha kaa mbyo ovitungwa porwe nungwari ye raisa onḓengu, onḓikameno nongunḓe omaṱunḓu ku ya sere okutungira ominyo vyavyo. “Indji ongendo ndji tu hi na maatu rangaranga kuyo rukwao. Kai ngundiparisa ombwiro yovandu vetu porwe, nungwari i handa omayenenekero wawo okukayenda komurungu nokuyandja ohambwarakaṋa komekurisiro ouparanga worukondwa rwetu,” ma tja. 

Na weza kutja oruveze rwa horo Otjirata nozongomainde okukara novitjitwa vyotjivara nomikukutu okuṱuna omatokero womaha morukondwa.  

Eye wa yandja ondunge yombongarero mu Kambundu ndji mai woronganisa ovatjiwe, ovakuranepo vohoromende, ovanane voviwaṋa novanarupa varwe. 

“Omboronganeno yomaunguriro wakumwe ndji mai tu yandjere okuhungirira komazengururiro omakarerere tjimanga, posi ya wina okutara koviṋenge vyarwe tjimuna okuyenena mondjaṱu, okuvasisiwa nomerikarekero wokuti nozondendera,” ma handjaura.  Na ningire kutja otjiungura hi tji honinwe atjihe rumwe moupapi na mouparanga watjo okuyenenekisa omekuriro wotjihuro nokozombanda moruyaveze kutja kangamwa omukwatera ma kare neha rondjeverero nu nda pwire. Nampa