Auleria Wakudumo 

Okakomisi komahoololo oka holola kutya omahoololo moshikandjohoololo shaGongo itaa iwa moshipala kelikufo momahoololo lomukufimbinga wongudu yoIPC Ndalikutya Shonena momahoololo oukansela twa taalela mo26 Novemba 2025. 

Shonena okwe li kufa mekufombinga lomahoololo oukansela woshikandjohoololo Ogongo Etitano. Momukanda wa shangelwa ongudu yaye ikulu, Shonena okwa holola kutya okwa tokola a fiyepo ongudu yoIPC opo a dule okukufa ombinga meengudu dopapolitika dimwe odo tadi mu etele exumokomesho. Konima ashike yokulikufa momahoololo nokufiya po ongudu yoIPC, Shonena okwa waimina ongudu yoSwapo, oyo a li ta kondjifa ngeno momahoololo. 

Omukulunhu wokakomisi komahoololo Peter Shaama okwa yelifa kutya okatendo komahoololo ko2014, oka fatulula kutya omahoololo itaa shunwa monima, a undulilwe komesho ile a kalekwe shaashi omukufimbinga wonhumba ina hala vali okukufa ombinga. “Oveta yomahoololo ohai pitike ashike oshinima sha tya ngaha ngeenge pena onghalo tai fininike ngaashi: omufimbinga a xulifa, ile omunhu ita dulu okulonga oilonga oyo molwa oulema wonhumba,” Shaama okwa fatulula kutya okakomisi oka tokola okutwikila omahoololo shaashi vati elikufombinga momahoololo itali imbi oshiwana shi hoolole kansela washo. 

Omhango yokakomisi komahoololo ohai fininike ovakufimbinga va kufe ombinga nonande inava hala. Oha yeulukila keshe oo a hala okulikufa mo, adje mo ashike omahoololo otaa twikile ashike komesho. -wakudumoauleria@gmail.com