Hi ra Katjikururume, 

Omasa nga ya za pi?

Ovikwaye mbye ha syekereko?

Otutjandja, osarama Etunda, 

Ozonganda zomerihongero wokombanda na vyarwe! 

Ovingi ka rukirwa na mbya ungura.

Omawa omatwezu indu tji ye ri po! 

Omawa nu nge ha toora 

indji ngu yeya nawo! 

Tengarindi mueze wozondembenge!

Mueze wozombangane zetu!

Mueze mbu toora, mbwa toorere pondomba

nai mbwa toora omasa wetu rukwao! 

Ya ri povita vyaRumbango!

Ya ri pondjembo ya Kasinga!

Orutjindo rwa Tjawana wina opu ya ri!

Omasa nga Ami ye ndji uru okuiimba?

Oviku vya homoka, outa wa sewa tjo!

Ohanga ohongora ye rirumbire ! 

Ondjembo mwa sewa tjo! 

Otjiuru tjoviuru tja i, ousengo noutuve 

ombu twa hwiririke meyuru.

Naṋi mokotora otjiwa, omasa noupamwe

Kwete kourumbu nohangauti 

aihe ndji we twesa mo. 

Omasa ya ire ingo manenenene! 

nga kwatwa rukuru mOkahao kao.

Twa sewa mokuti ongaango?

Omasa aya ngundiparere, 

tjiri wa ri mbo, otjomburo ombwa 

mu ngamwa tjihorera. 

Hi ra maendo wa koviti,

Hi maamu rarere tate Kamekuru,

Omusya wa Riarua wona ya Mujenda

Hi rOvangandjera novakwendata oveni, omasa ya pwirire!

Hi ewa ma ri wama tjiṋe, ma ri kakwa pi? 

Ourenga wa i,

Imbwo uvapa twee, 

twekerere otjomaihi wotee, mbwa harekw’ ovakuahere!

Ourenga womayo omavapa twee, ovakwao ave yaruka nokanyo mwa ri ye? 

Nopuwo wa i 

U yende u kasuve

Jehova mu yakura

Omasa omape 

Mu pa nga kongaaruhe

Ama sekama okuya keumbo! 

Omasa wetu omawa, 

twa perwe i Ndjambi 

nu ongwe tu yeka rukwao! 

Ya munikwa i Katjikururume

nourenga otjingewo koruyezu oruvapa 

owo ndjona yerero. 

Omasa ya ire!

Ingo wombango ye omuini, 

ngwa tja ehi ndi matu kutura tjotjiri!

Na ri kutuka nga ku ndino ozombura 

omirongo vitatu na ndano Zongutukiro

Owee ya ire tjiri!!! 

B. V. Kuritjinga (2025)