Otjikando hi Ovandoitji ngave ritjinde otjovandu mbeeku humiṋa otjiwaṋa tja Namibia.

Tjinene Operesindenda yEhi rOvandoitji tji mai ya kOnamibia okuyekukara pombakero yaIhe yOtjiwaṋa ngu ma suvisiwa muhuka pEtjorozombangaṋe. Ozombara zOvambanderu nOvaherero mehika razo ra Kandjoze rongondjero yotjisuta tjombinḓu yovaṱi novakuru vazo ndja tjononisiwa i yEhi rOhuurire yOvandoitji. Na wina ominyo vyawo mbya pandjara mOtjiṱiro Otjindjandja tjingetjo.

Amave isire komeritjindiro kuwo nge ha ri omawa ombura ndja zuko mu Tengarindi Operesindenda yEhi rOvandoitji, Frank Walter-Meie tjeeku kara pombakero yomuyaruke omuheṋendu nOnongo Hage Geingoba. Tja tjere eye na Geingoba vari notjiungura tji va sewa natjo momake nu tji ve ha manene ohunga nOtjiṱiro Otjindjandja. Nu tji ma yaruka kehi re na kakotoka okuyekuningira ondjesiro.

Ozombara maze tja omambo ngo yari omapukise kuwo na wina ouye auhe tjinga otja kuwo otjihungiriro tjOtjiṱiro Otjindjandja ngunda kuwo atji hina indi tja toorere omuhunga mbu ri wo nu wina ngamba atji hi ya hara otjivara tjonḓero yawo na wina ozondekurona ozengi zaimba mba hupa. Onḓuvasaneno Yapamwe pokati ka Namibia nEhi rOvandoitji, otjingi tjozondekurona wina za yara nokunakaura kaparukaze. Okutja Operesindenda yEhi rOvandoiji poo kangamwa omuhindwa wehi ndo okuyekuhungirira kOnḓuvasaneno Yapamwe, pendje nokuriṱiza pombinika ye yoruhoze, otjeri okupatura otjirwaro tji tji hi ya veruka. 

Mbi ungurua ongondoroka nOtjiṱiro Otjindjandja i yOnamibia nEhi rOvandoitji ngamba kavi ya rira ovitjate kozondekurona kaparukaze. Mu nao ehi nai otja tji riri moruhoze Ovandoitji ngaave roro ave ungurisa oruhoze Onamibia mu riri oku hungira oviporoporo nokupukisa ehi nouye auhe ayo pe noviṋa ovisemba poo vyotjivara mbya ungurwa. 

Ovandoitji okuya ave riporinḓa nave yandja ombinika yavo yoruhoze ave tinyauka ave yaruka kehi rawo. Tjinga ozondekurona nai aza pandjarisa ongamburiro mohoromende yOvandoitji na wina ya Namibia tji kweya kotjihungiriro tjOtjiṱiro Otjindjandja.

“Otjozombara norupa okuura zozondekurona twa yandjere ohoromende yetoveni ya Namibia, nongwao yEhi Rovandoitji orure okuungurisa otjiposa tjetu tjOtjiṱiro Otjindjandja, ondjesiro nOtjisuta mozonḓero zazo ozeni pokati kazo ngandu Onḓuvasaneno Yapamwe, mouatjiri ndjiri ombatero pokati kazo uriri, i ungurisiwa nokuraisiwa ayo ondjiri Otjisuta. Otji matu yarukire po rukwao kutja ombatero yomekurisiro kandji ri otjisuta nu ngai roro okusasanekwa nokuṱekisiwa pOtjisuta tjinene ihi tjOvaherero, Ovambanderu nOvakwena.”