Taimi Haihambo 

Ongwediva – Omatala odoolopa yaNgwediva moshitukulwa shaShana, oo a li a ninga efimbo lonhumba itaa longifwa, shaashi a li metifa lokulongwa, okunenepekwa osho yo okufewekwa vati oku li pokupwa.

Omupopiliko wodoolopa Ottilie Shingenge okwa ti omatala okwa kala ashona, hano okwa li ta a monika a finana, wo ihaa nane lela eekastoma. “Nande ovatelelipo ve ya modoolopa, ihava kala lela va mbekulwa shaashi oshinima osha finana ashike,” ta ti. 

Okwa ti oilonga ei ya kala momatala okweeta mo oinima ipe, ngaashi outala vokulandifila opo va dule okuyandja omhito kwaava hava kala va hala okuninga omangeshefelo opedu, ndele kave wete apa tava uka, ta ti. Vati ova weda mo yo oinima inyakula momesho, oyo tai nanene ovaendanandjila va ka sapote meni. “Oinima ei twa weda mo kondadalunde ongaashi, okulongulula oundjuwo, okutula mo outiyelesa vape pedu, outala vokuhondjela vape, okupaindulula eesilinga osho yo okuandjakanifa olusheno moutala vape, naikwao ya wedwa po. Shingenge okwa ti pefimbo ovanhu ve lipyakidila nokulonga omatala, ovalandifi vakulu natango ova pitikwa omo va kale, opo va dule okulinyangela. 

“Ashike nande ongaho otwa fya oshisho kutya ovanashilonga voshito ava ve li mo, ove liamena kwaaishe ei tai dulu oku va etela oupyakadi woundjolowele wavo,” ta ti.

Opoloyeka vati oya pula elelodoolopa eemiliona nhatu, noya teelelika i kale ya pwa muNovemba 2025. 

-Taimihaihambo2000@gmail.com