Auleria Wakudumo
Omupresidente Netumbo Nandi-Ndaitwah okwa tongomona James Unomasa Uerikua onga omunyasha omunandjungu moilonga yaye, oshipuna mouluvi nokuna ondaka ya tova nawa mokupopya kwaye.
Nandi-Ndaitwah edi okwedi holola momukanda pefimbo ta halele ovakwanedimo vaUerikua, Ovakwaswapo oshoyo Ovanamibia aveshe koonono omahekeleko.
“Ponhele yepangelo noshiwana shaNamibia, ohandi yandje omahekeleko kovakwanedimo vaye, ovaholike vaye, oohailwa pamwe naye moSwapo, ovanailonga momutumba wopashiwana nokOvanamibia aveshe,” Omupresidente ta hekeleke ngaho.
Otaku hokololwa Uerikua a xulifa moshiponga shotuwa opamwe nomonamati omanga omukulukadi waye eli ta mono epango lopaunamiti navavali vati ova xupa moshiponga omo tuu omo eshi inava mona unene oshiponga.
Oshiningwanima eshi osha ningilwa pokati kopate yaKakarara nOtjiwarongo, Olomakaya. Uerikua okwa li ngoloneya mukulu woshitukulwa shaTjozondjupa okudja muApilili 2020 fiyo 03 Apilili 2025 eshi a momusholondodo womadina oSwapo aavo va uka komutumba wopashiwana. Okwa hangwa eli onga oshilyo shomutumba wopashiwana shongudu yoSwapo.
Nandi-Ndaitwah okwa ti mokukala po kwaye, Uerikua okwa li omunyasha a ndjunguka moilonga yaye, ena eendunge kamana nokwa li ena ohokwe mokunghonopaleka oudemokoli moshilongo. Omupresiddente okwa halela yo ovo veli moshipangelo tava mono epango lopaunamiti eveluko lomeendelelo.
Ovanailonga pamwe naUerikua oshoyo eengudu dopapolitika dihapu oda yandja omahekeleko kovakwanedimo vaUerikua molwa efyo laye.
Vahapu ova tula komapandja avo opaungoba tava tangumuna Uerikua onga omulitule mo moilonga yaye nomunhu muwa okulonga pamwe naye.
Hamushangadjai wongudu yoSwapo Sophia Shaningwa okwa holola kutya Uerikua okwa li oshilyo shongudu yoSwapo nokwa kala nokulitula mo noudiinini moilonga yaye.
Okwa ti efyo lay eina li kuma ashike ovakwanedimo vaye ndele ola fiya ongudu oshoyo Ovanamibia aveshe vehena oitya nomatumbulo.
Ongudu yoAffirmative Repositioning (AR) nayo oya yandja omahekeleko kepanga lavo loFacebook kovakwapata vaUerikua.
“Ohatu twikile ap awa xuulila opo tu yambule po oshilongo. Owa kondjela Ovanamibia nowa ulika ohokwe okutula oshiwana komesho alushe moilonga yoye,” etumwalaka tali ti ngaho. Ongudu yo Popular Democratic Movement (PDM) nayo oya holola kutya otai waimine Ovanamibia aveshe mokulila Uerikua.
Omanga oIndependent Patriots for Change (IPC) ya yandja omahekeleko kovakwanedimo vanakufya. Ongudu oya holola momukanda wa tulwa koFacebook kutya Uerikua okwa li omulitulimo nokwa kala alushe ena ohokwe moilonga yaye.
Nonande eengudu dihapu da yandja omahekeleko, ovanailonga pamwe nanakufya ova ulika nghene va longa pamwe naye lwaxuuninwa momutumba wopashiwana komalungula.