Auleria Wakudumo
Ondangwa – Elelo lodoolopa yaNdangwa otali ka tembula omaumbo 42 okudja kolukanda Uutala okuya kolukanda tali ifanwa paife Omashaka Proper.
Omupopiliko welelo lodoolopa yaNdangwa Petrina Shitalangaho-Mutikisha okwa holola kutya omaumbo otaa twalwa kolukanda oko kuna eemhumbwe da wana po ngaashi omeva, omakwafo elelo doolopa elixwapo oshoyo olusheno.
“Ovakwashiwana ova kala hava di molukanda Uutala, mu hena oipumbiwa aishe ya tumbulwa petetekelo. Elelo lodoolopa ola hala okukandula po omukundu ou, nola hala ovakwashiwana aveshe va kale hava mono omakwafo eli xwapo,” Mutikisha ta ti.
Mutikisha okwa ti omaumbo okwali eli 606. Omaumbo 564 otaku hokololwa a kufwa po nale kelelo lodoolopa ponhele opo.
“Omaumbo 564 okwa twalwa nale kolukanda hali ifanwa Onatsi proper nOnatsi Ext 1 momudo 2018,” Mutikisha ta ti.
Mutikisha okwa weda po ta ti omaumbo 42 okwa fyaala po shaashi onhele yali ya pwa po momalukanda avali oo kwali a twalwa vakwao. Olukanda lipe, Omashaka Proper olina onhele ya wana omaumbo 231. Olukanda olina yo olusheno nomeva.
Ka kele komayakulo elelo lodoolopa, omeva nolusheno molukanda lipe, ovakwashiwana otava ka shangifwa yo eeplota komadina avo nokutunga omaumbo avo.