Jazema Hangero 

Ondekurona yOtjiṱiro Otjindjandja Uzakuje Arnold Kamuvete ma tja okuyozika nokutenga pamwe nokuzemburuka ovakuru mba pandjara, mba zenga, nokuṱa mOtjiṱiro Otjitjandja otjitenga tjeserewondo oritjamirongo vivari nḓa kapita ohepero tjinene nomasa. 

Noondarire kutja ohoromende ya Namibia nambano mai zemburukire 28 ku Kambundu otjeyuva rOtjiṱiro Otjindjandja kotjiveta, ovingi ngunda vi sokuungurwa tjimuna ozombara zomuhuko okuisirasana ze rwe pamwe motjirwa tji kokutja omahungiriro wOtjiṱiro Otjindjandja ye kawondje oupupu nu ye munuke tjimanga tjandje ovandu mave twara kumwe oviuru. 

Omazemburukiro weyuva ndi pari omihoko tjiva uriri tjinene imbi mbya ṱunwa i yOtjiṱiro Otjindjandja ohunga pu pa sokutja eyuva nda zemburikirwe pondondo yehi arihe tjimuna ovitjitwa vyarwe mbi zemburukwa pondondo yehi. Otjiṱiro Otjindjandja tji sokuuta okuhongwa mozosikore kokutja ouye nomihoko vyarwe mbi ha karere norupa ndwa yenene momazemburukiro nga moruyaveze ve tjiwe kokutja omazemburukiro nga kawOvaherero nOvakwena porwe, nungwari oyotjiwaṋa/ehi nouye auhe moupapi na mouparanga wawo. Ozonganda zomauhonapare wombazu okuhina okuya pamwe okuzemburuka eyuva ndi itjimwe tjoviṋa mbi mavi sokuṱunwa kokutja ovandu ve zemburuke eyuva ndi poruveze rumwe nu otjomuhoko pendje noutjongo mbwa munikirwe. 

Ozombara za Kandjoze za woronganene poruveze rwOmerinaneno indwi UN Plaza ngunda Ovambanderu kehi yOmbara Tjozohongo II Nguvauva ava karere nomazemburukiro wawo oveni pokomando yawo moukoto wa Tjomuise mOkatutura. Ohaṋi ndjiri pokati kozonganda zomauhonapare maye wombisa otjihungiriro tji. Kamuvete ma toko nokuṋanga omitanda vyotjiwaṋa tja Kouherero nOvambanderu vi sekamene ovitjitwa otja imbi, vi rire eraka nomeho wotjiwaṋa tjawo apehe pu ve ri. “Ngatu rihonge ekuruhungi retu, kokutja tu toore otjirwa tji ovanene vetu pu ve tjesire kokutja atu ha pandjara eṱa novirumatwa vyomuhoko mbwi.,” me ri hekene.