Auleria Wakudumo
Ouministeli wounamapya nounaimuna, eeshi, omeva nomatalululo omadu owa mona minista mupe, Inge Zamwaani.
Omupresidente Netumbo Nandi-Ndaitwah okwa ulika minista mupe a kale oshilyo shokabinete osho yo okuninga minista mupe wounamapya,sha landula eshi minista nale Mac-Albert Hengari a kufwa mo moilonga komupresidente molwaashi ta tamanekwa moshikumungu shekwatonghonga.
Omupresidente okwa holola kutya oku na elinekelo mominista ipe nokwa teelela i ke shi endife nawa moilonga mouministeli waye.
Zamwaani oku na owino wokulonga moikondo ya yooloka yepangelo ngaashi meemina nomeembaanga.
Hengari okwa tulwa moipandeko Olomakaya lomafiku 26 Apilili neudo vati kwa li ta kendabala okufuta oshimaliwa ombubo yoN$222 000 omukainhu weedula 21 ou e mu patululila oshibofa shekwatonghonga.
Opolifi oya holola kutya minista okwa lombwela vati omukainhu opo a ka kufe mo oshibofa.
Opolifi oya holola yo kutya nakuningwa oshihakanwa paife oku na okaana omo vati Hengari kwa li va ka ningilwa omakonakono o-DNA opo ku talike ngeenge okaana okaye.
Hengari okupitila mohahende yaye, Patrick Kauta,okwa pula a pewe ombapila yoidjemo yo-DNA oyo ya kufwa pefimbo ta ningilwa omakonakono.
Ohahende yaye oya ti etulo moipandeko laHengari ola unganekwa kopolifi moipafi yovatoolinghundana ovo va faneka Hengari noimaliwa yaye ofulundudu.
Okwa ti oshinima shi li ngaho osha nyika oshiponga shaashi ohashi eta oveta i kale ya ama ombinga komunhu umwe moshibofa ngaashi osho.