OSHAKATI – Omolwenota lyiimuna ndyoka hali kala ko ngele inaku lokwa nawa miitopolwa yokonooli, aanafaalama oyu uvite kutya omeya ogendji ohaga hepa, inaaga gongelwa.
Aanafaalama otaya nyenyeta kutya omeya ogendji oga ya inaaga gongelwa, omanga haya kala niimuna tayi si kenota pethimbo lyokwenye.
Taya ti, omvula nuumvo oya loko nawa ihe omeya ogendji oga hepa nonando pe na ngaa iitopolwa yimwe mbyoka ya gongela po gamwe.
Omuprimaminista Elijah Ngurare okwa koleke kutya nonando gamwe ga yi, omeya gamwe oga gongelwa momithima miitopowa yimwe konooli.
“Iitopolwa ngaashi Oshana nOshikoto oyi na omithima dha ningilwa owina okugongela omeya, onkene omeya gomvula itaga hepa agehe,” ta ti ngaaka.
Malakia Shigwedha a yambukile momukunda Ogongo moshitopolwa shaMusati, ota nyenyeta kutya omeya ogendji oga yi, ga hepa.
“Epangelo okwa li lyi na okukala lya thitha omithima dha gwana opo omeya kaaga hepe nando, naangoka taga ka ya ngeno oongoka itaaga vulu okuya momithima,” ta nyenyeta ngaaka.
Simson Shitaatala, okwa ti ota pe uusama epangelo oshoka okwa li oshinakugwanithwa shawo okukala sha longa nuudhiginini opo shaa hepithe omeya nando.
“Enota lyiimuna otali ke ya ngaashi shito, uudhigu mboka hatu kala twa taalela uuna omvula inaayi loka nawa,” ta popi ngaaka.
Ngoloneya gwoshitopolwa shaMusati Erginus Endjala okwa koleke kutya omeya ogendji oga ya, ga hepa.
“Omeya gomvula ogendji oga ya, oshoka katu na omithima dhokugongela omeya dha gwana moshitopolwa. Ndhoka dhi li mo inadhi gwana,” ta popi ngaaka.
Metengenekothaneko lyoshimaliwa lya landula ko otatu tala nkene tu na okugwedhela oshimaliwa okulonga omithima dhokugongela omeya, oshoka enota uupyakadhi uunene.
Ngoloneya gwoshitopolwa shaHangwena Sebastian Ndeitunga okwa ti, nonando mu na ngaa omithima dhimwe moshitopolwa, omeya ogendji oga ya.
“Ngeno okwa li tatu kutha oshiholelwa koshishiindalongo shetu Angola, ngeno omeya itaga hepa.
Otandi dhiladhila ngeno kuthewe omithima dha landulathana opo omeya ga tikile momuthima omukwawo uuna gu udha, momukalo ngoka omeya ogendji itaga hepa,’’ ta popi ngaaka.
Ndeitunga ota ti omithima ndhoka ngeno otadhi thewa koongamba hoka haku zilile omeya.
Ta gwedha po ta ti, epangelo otali longo nuudhiginini okutula ayihe mbyoka miilonga, opo omeya ga hepe go gaa yonagulepo we omapya nomagumbo gaantu osho wo okupatitha oosikola.
Ngoloneya gwoshitopolwa shaShana Elia Irimari okwa ti nonando moshitopolwa shaShana omu na omithima, oshindji osha pumbwa natango okulongwa okugongelwa omeya.
Omunashipundi gwombelewa oonene dhOshana Andreas Uutoni okwa ti oshitopolwa shaShana osha gongela omeya momithima.
“Otatu pandula nuumvo otwa mono omuloka omwaanawa, niikandjohogololo oyindji moshitopolwa shaShana oyi na omuthima,” ta popi ngaaka.
Ta ti, oye na wo etengenekothaneko kutya kehe omumvo kehe moshikandjohogololo otaya kala taya the mo omuthima.
-vkaapanda@nepc.com.na