Oshikondo shuhaku Indira Gandhi mOkahao otashi hiya oshigwana shi talelepo ehala lyawo, opo shi vule okukonakonwa omikithi dhokaankera oshali.
Omakonakono ngoka otaga ka kala ko esiku limwe ashike Olyomokaya, yomasiku ga03 gaSepetemba nuumvo.
Sha ikolelela komushangwa gwa pitithwa kundhotola Linda Nangombe okwa ti, omakonakono ngoka otagaka ningilwa omeme notate, no tagaka ningwa osha li.
“Aalumentu naakiintu ayehe moshilongo oya hiywa opo ye ye ya konakonwe omikithi dho kaankera, ngaashi komagundji, kiivalelo oshowo maalumentu,” ta ti ngaaka.
Okwa shanga kutya esiku ndyoka otaku ka gandjwa wo omalongo oshowo omauyelele kombinga yomikithi dha yooloka oshowo uundjolowele.
Omanga omakonakono ngoka tagaka ningwa kOkahao, mOngwediva namo omuna omakonakono go shali gomikithi ngaashi oosuuka, ombizi yalonda nosho tuu.
Oshipangelo shaMedipark ngaashi hashi ningi omvula kehe, otashi konakona oshigwana oshali momauliko giipindi mOgwediva.
Ngoka kwa li ta kwathele pokatala koMedi park Osoondaha ya ziko okwa ti, otaya ningi omakonakono oshali sha muhongi.
“Aakwashigwana otweya kondo omagulu opo ya tseye noku kaleka po uundjolowele wawo, oshoka oyendji yo muyo mboka ya li ya tutswa noya li ya monika omukithi gwosuuka nenge gwombinzi ya londa okwa li oshikando shotango okututswa. Ko kutya oshigwana inashi patuluka natango, kashi uviteko uuwanawa wokututsitha omalutu gawo komithkithi dha yooloka ngaashi ndhoka oshowo okankela,” ta ti ngaaka.
Ta kumagidha aakwashigwana ta ti, osha simana okutseya omikithi dhi li molutu, oshoka ngele uuvu tawu holoka ihawu ti ndeya, oto mono ashike togu wu li mokati kaantu.
To dhilaadhila kutya ino iyuva nande to ehama, ihe ku shi kutya owu na omikithi dhini ndhoka tadhi ku pe omadhidhiliko ge li ngaaka.
Oshidhigu ngele omuntu a monika omikithi ngashi ndhoka kwa toka oshoka iha kala po nawa mbala.
Ta kumagidha kutya aakwashigwana naya thikame opo ya kale yathika piipangelo yopopepi opo yaka minikilwe nokututswa omikithi dha yooloka momalutu gawo.
Selma Nghihepa ngoka a li e na okatala ko kulanditha iikwamagadhi yokunika nawa momawuliko giipindi okwa ti, okwa monika ombinzi yi li pevi ihe okwa li a nyanyukwa oshoka kakwa li u uvite ko kutya oshanika oshiponga okumonika ombinzi yi li pevi, ta ti nani kasha li mondjila. – vkaapanda@nepc.com.na