Motjikasuka otjitenga tjotjimariva otjitenga tjombwiko yehi yomekurisiro womitanda mape munika aayo omitanda vyotukondwa hwi: Erongo, Okunene, Omaheke na Tjozondjupa kavi ya tjita omaningiriro kotjimariva tji.

Oministera Ondenga, Eliah Ngurare, Omandaha otja tjiukisire ombwiko ndji kotjiveta motjihuro ohongora tja Maheke, Epako. 

Wina wa tjiukisire imba poo ovitjitwa mbya muna ouṋingandu wombatero yotjimariva okuza mombwiko ndji, nai yovandu, ozonganda poo ozongetjesa o-42 nḓa tjiukisirwe kutja za yakurwa kokupewa otjimariva tji okuhitisa poo okukawondjisa natjo ovitjitwa vyazo vyokunyomona natjo otjimariva tjomuano wokurivatera poo okuriungurira nokuhara otjiungura tjokurivatera mongorongova poo ombwiko nokumema oviungura.

Nandarire kokutja omatjiukisiro nga yari mEpako mOmaheke, ongahukiro kutja nai ngunda motjivarero tjovandu mba tjiukisirwe otjovaṋingandu mokupewa otjimariva tjokurivatera nozongetjesa zawo, ongahukiro kutja ngunda omitanda vya Maheke kavi ya tjita omaningiriro kombwiko ndji. Tjinga na movivarero mbya raisirwe Omandaha amu novandu vetatu uriri poo ozongetjesa ndatu nḓa tonene. Mozondora za Namibia azehe kumwe ape nai omangete o-14 nḓa kwizikirwe Omaheke a rwa pewa ape engete rimwe nokanḓe noine (1.4). Tjazumba wina kape nongahukiro kokutja imba nai mba munu ouṋingandu mbwi okuza mozoresevate mOmaheke tjimuna moutukondwa womatoororero woo Mongua, Otjinene, Epukiro na Tjombinḓe oto tu turi moresevate ya Maheke.

Tjingetjo oomuano mbu mau munika motukondwa iho twarwe Erongo, ndwa munu ozondora za Namibia engete rimwe nokanḓe nombari (1.2); Okunene no 2.2 no Tjozondjupa ndi ha rurumine nandarire ozondora za Namibia engete rimwe ngunda nai nda munu ouṋingandu wozondora za Namibia 999,000-00. 

Tjingetjo otjimariva ihi motukondwa atuyetatu hwi mouparanga wato. Pu pe hi ya kara ongahukiro kutja mozombokoto twato mozoresevate nai ngunda ku nokamariva ka zizirengo mo kutja pe novandu poo ozonganda nḓa tjitire omaningiriro kombwiko ndji. 

Ngunda ape ri nao Ongooneya ya Maheke, Pijoo Nganate, ma toko omitanda morukondwa rwe okuvara ombwiko yehi yomekurisiro womitanda onḓinina yokuyeneneka oturoto twavyo motjitamba tjokuuta ozongetjesa. Onampa ya tjangere nao Omandaha.