Opolifi moshitukulwa shaShikoto oya tula moipandeko ovalumenhu vahamano eshi va ponokela nokulemaneka omukwashiwana waAngola molwotombo. 

Oshiningwanima eshi osha ningilwa momukunda Onamutenya mOmuntele, lwopo 23h20 Osoondaxa. 

Ovalumenhu Ovanamibia ove na eedula okudja po18 fiyo opo30. 

Omupopiliko wopolifi moshitukulwa shaShikoto, Chief Inspector Ellen Nehale-Kangulu okwa koleka oshiningwanima eshi. 

Otaku hokololwa umwe womovafekelwa a hanga ovanhu, mwa kwatelwa nakuninga oshihakanwa tava nu nhamila poundingosho nokufikila te lipe mo mehalasha lavakwao pehe na epetikilo loovene valo. Eshi osha eta opo va tameke okutanguna. 

Opolifi oya ti omufekelwa okwa yandja ombili eshi a nwa mehalasha lovanhu ndele ta di po poukamba. 

Konima yokafimbo, vati omufekelwa okwa aluka navakwao vavali nokutukulula eenhamanana odo kwa li a fiya po nale. 

“Eenhamanana oda ya fiyo va tameka okuluumba nomamanya nomakende. Nakuningwa oshihakanwa okwa dengwa nekende momutwe ndele te lidenge pedu,” opolifi tai holola. 

Nakuningwa oshihakanwa okwa twalwa kokapangelo kOkatope ndele ta tuminwa koshipangelo sha kula kOshakati a ka mone epango lopaunamiti la wedwa po. 

-wakudumoauleria@gmail.com